Qırım tarihçısı Gülnara Bekirova Totalitar rejimlerini tedqiq etüv Çeh institutınıñ mukâfatını aldı – «Demokratiya, azatlıq ve insan aqları printsiplerini qoruv ğalebeleri içün». Bu aqta o, Facebookta yazdı.
«Taqdirlev merasimi Çehiya senatında olacaq edi, amma pandemiya sebebinden başqa vaqıtqa qaldırıldı. Şunıñ içün mukâfatnı şimdilik almadım, amma şimdi şunı ayta bilem ki, bu mukâfat tek menim degil, aqqında kitap ve maqale yazğan, yayın ve vesiqalı film azırlağan qırımtatar halqımnıñdır. Bu dost ve zenaatdaşlarım, işbirligi yapqan ve sevimli işimni yapmağa, fikrimni serbest bildirmege imkân bergen qurulışlarnıñ mukâfatıdır», – dep yazdı tarihçı.
Bekirovanıñ mukâfatlanuvı aqqında malümat Çeh institutınıñ Facebook saifesinde de bar.
Gülnara Bekirova – tarihçı, siyasiy ilimler namzeti. 2014 senesine qadar Qırımda ATR qırımtatar telekanalında çalıştı ve Qırım müendislik ve pedagogika universitetinde ders berdi. 2014 senesi noyabr ayından berli – Qırım.Aqiqatta «Qırım tarihınıñ» müellifi. ATR telekanalında çıqqan «Tarih sedası» programmasınıñ müellifi ve alıp barıcısıdır, Ukrain PEN-merkeziniñ azası. Onlarnen kitapnıñ müellifi, altı vesiqalı filmniñ stsenariy müellifi, bir çoq maqale ve Ukraina ve çetel künleviy haber vastalarında çıqqan yazılarnıñ müellifi. Bekir Çoban-zade Halqara mukâfatınıñ laureatı, «Yıl kitabı-2017» kitap reytinginiñ finalcısı. Qırımtatar Milliy Qurultayınıñ qırımtatar genotsidini ögrengen mahsus komissiyasınıñ reis muavinidir.