Ukraina TİN birinci muavini Emine Ceppar, «Qırım» sanktsiyalar cedvelinde tahminen 5,5 biñ hususiy ve uquqiy şahıs olğanını ayttı. Bunı o, iyülniñ 13-nde «Qırımnıñ işğalden azat etilmesi siyaseti: sanktsiyalarnıñ emiyeti» halqara tögerek masa vaqtında bildirdi, dep haber ete TİN matbuat hızmeti.
Böylece, Cepparnıñ sözlerine köre, «sanktsiyalar siyaseti mehanizmi bugün Rusiyeniñ Ukrainağa qarşı silâlı tecavuzınıñ qarşısını almaq yolunda siyasetniñ ve tış siyasetniñ eñ tesirli vastalarından biridir».
«Kremlniñ halqara tecrit siyaseti ile beraber Rusiyeniñ Qırımnıñ işğalini qanuniyleştirmege ıntıluvlarınıñ tanımama halqara siyaseti ile beraberlikte tecavuzkâr memleketniñ davranışına tesir ete bilecek sanktsiyalardır», – dedi o.
Bu yıl Ukraina TİN teşebbüsi ile işğal etilgen Qırımda fahriy konsullıqnıñ açılması sebebinden Nikaraguağa qarşı sektor sanktsiyalarnıñ qoyulmasını hatırlattı.
«Sanktsiyalar siyaseti niayet müim ve belki de Rusiyeniñ arbiy olmağan yolnen toqtatmaq içün yekâne tesirli bir vastağa çevirildi. Bu, aynı zamanda Kremlniñ silâlarını daa da yañartmaq içün qullana bilecek RF-nıñ devlet bücetine emiyetli derecede kelir ğaybıdır», – qayd etti Ceppar.
SEE ALSO: Qırım.Aqiqat yañartılğan haber qullanımını taqdim eteUkraina Yuqarı Radası, Milliy telükesizlik ve mudafaa şurasınıñ işğal etilgen Qırımda “fahriy konsullıqnıñ” açılması içün Nikaragua Cumhuriyetine qarşı sektor sanktsiyalarnıñ qoyulması aqqında qararnı tasdıqladı. Muvafıq qararnı parlamentniñ baqıluvına Ukraina prezidenti Volodımır Zelenskıy teklif etti.
Bu qararğa 322 millet vekili qoltuttı ve beş yıl müddetine qoyulğan sanktsiyalar quvetini aldı. Nikaragua konsulı vazifesine 2020 senesi noyabr ayında “Qırım baariniñ” faal iştirakçisi, Ukrainada 13 yıl apis cezasına mahküm etilgen Rusiye vatandaşı Oleg Belaventsev tayin etildi.
Fevralnıñ 1-nde Ukraian prezidenti Volodımır Zelenskıy Yuqarı Radanıñ baqıluvına Nakaraguağa qarşı sanktsiyalar qoyulması aqqında qararnı teklif etti. Fevralnıñ 2-nde Ukraina parlamentiniñ mebusları bu qararğa qoltuttılar.
Avgustnıñ soñunda Ukraina TİN başı Dmıtro Kuleba, Qırımda Nikaraguanıñ fahriy konsullığı açılğanını bildirgen edi. Konsulnıñ vazifesine Qırımnıñ ilhaqında iştirak etken Oleg Belavenets tayin etilgen.
Oktâbrde Ukraina Nazirler Kabineti işğal etilgen Qırımda konsullığını açqanı içün Nikaraguağa sanktsiyalar qoymağa teklif etti. Nikaragua Ukraina ükümetiniñ qararını açıq tefsir etmedi.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.