"Qırım musulmanları davası"nıñ kör figurantı Aleksandr Sizikovnıñ anası Yelena, oğlu tutulğan Aqmescitniñ 1-inci SİZO-sında oğluna ilâc berip olamadı, dep bildire "Aleksandr Sizikovnıñ destegi" telegram-kanalı.
SİZO ziyareti vaqtında o, Sizikovğa ilâc ve tonometr bermek istegen, lâkin Rusiye Federatsiyasınıñ FSİN hadimleri ilâclarnı almaqnı red etip, tek tqan basımı ölçevi neticesini sesli şekilde bildirgen inklüziv tibbiy cihaznı alğanlar.
"Tünevin anam SİZO-ğa barıp, ilâclarnı, tibbiy vesiqalarnı ve Bağçasaray SİZO-sından ketirgen tonometrni berdi, amma tek tonometrni aldılar, ilâclarnı, bizde bar dep, almağanlar", — dedi o.
"Aleksandr Sizikovnıñ destegi" telegram kanalında, tutulğan qırımlıdan mektüp alğanlarını bildireler, mektüpte Sizikov apis şaraitlerinden şikâyet ete.
"Yañı kamerada şaraitler yaramay, qızdıruv yoq ve onı ne vaqıt açacaqları belli degil, gigiyena vastaları berilmey dep yaza. Biz satın alğan kartını alâ daa almadı, tükândan mallarnı, ümüt etemiz ki, yaqın vaqıtta alacaq, amma soñra bizge tükân mallarını satın almañız dep yazdı" , — dep aytıla haberde.
Oktâbrniñ 21-nde Rusiyedeki Krasnoyarsk ülke mahkemesi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
Orta küz ayınıñ 22-nde Qırımnıñ Bağçasaray rayonında aqşam Rusiye uquq qoruyıcıları "qırımlı musulmanlar davasınıñ" soqur mabüsi Aleksandr Sizikovnıñ evinde tintüv keçirip, onı alıp ketti.
Oktâbrniñ 23-nde Rusiye kontrolindeki Qırımnıñ Bağçasaray rayon mahkemesi Aleksandr Sizikovnı "poliske riayet etmeme"memuriy maddesine istinaden (Rusiye Federatsiyası Memuriy uquq bozuvları kodeksiniñ 19.3 maddesiniñ 1-inci qısmı) 10 künge apiske aldı.
Bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan "Hizb ut-Tahrir" diniy teşkilâtınen alâqaları bar olğanında qabaatlandı.