"Qırım musulmanları davası" boyunca Rusiye mahkemesi tarafından 15 yılğa azatlıqtan marum etilgen Qırımlı Asan Yanikov Vladimirskiy tsentral apishanesinden hastahanege etap etildi. Bu aqta "Qırım birdemligi" cemaat birleşmesine onıñ qardaşı Fatime Yanikova, diger mabüsniñ tuvğanlarına yazğan mektübine atıf eterek bildirdi.
Vladimirskiy tsentralğa etap etilgen soñ Asannıñ qorantasınen bağı aman-aman yoq.
"Ondan soñki mektüp Sabanda keldi. Onıñ şimdiki sağlıq vaziyeti aqqında aman-aman iç bir şey bilmeyim. Asannıñ hastahanege alınğanı aqqında haber etilgen soñ, Vladimir vilâyeti boyunca FSİN idaresiniñ yolbaşçısına ve müessise reberligine, qardaşımnıñ sağlıq vaziyeti ve bulunğan yeri aqqında haber berilmesini istep muracaat ettim", — dep tarif etti Qırımlınıñ qardaşı Fatime Yanikova.
Soy-soplarınıñ aytqanına köre, Asannıñ sağlıq problemleri apiske alınmazdan evel de bar edi.
2021 senesi Qara qışnıñ 18-nde Asana Yanikov ve ekinci Aqmescit "Hizb ut-Tahrir" davasınıñ diger figurantı Seitveli Seytabdiyevni Aqmescitten Rostov-na-Donu SİZOsına etap ettiler.
2023 senesi Sabannıñ 27-nde Qırımda FSB, Rusiye İçki işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdiler. Umumen 24 insan yaqalandı, olarnıñ arasında vatandaş jurnalistleri Osman Arifmetov, Rustem Şeyhaliyev, Remzi Bekirov.