«Qırım birdemligi» cemaat birleşmesi aprelniñ 3-nde Qırımda vatandaş jurnalistleriniñ taqip etilüvine dair muracaatını derc etti.
Faaller kütleviy haber vastaları ve aq qorçalayıcılarğa muracaat etip, yarımadada taqip etilgen vatandaş jurnalistlerine qoltutmağa rica ete.
«Ukraina, mustaqil Rusiye ve halqara kütleviy haber vastaları ve aq qorçalayıcı teşkilâtlarını repressiya ve taqiplerniñ qurbanı olğan vatandaş jurnalistlerine zenaatdaşlarına olaraq qoltutmalarına çağıramız; olarnı jurnalistler birliklerine alıp, olarnı vatandaş jurnalistleri ve vesiqacılar dep adlandırmağa rica etemiz, çünki video, ses ve metin malümatları tek haber sayılmay, Qırımda insanlarnıñ sistematik taqip etilüviniñ vesiqalıq qaydı ola, olarnı qorçalamaq içün jurnalistlerge tabiiy olğan mehanizmlerni jurnalist birlikleri ve birleşmeleri tarafından qullanmağa rica etemiz», – dep aytıla Facebookta derc etilgen muracaatta.
Faaller aq qorçalayıcılarğa da muracaat etip, Qırımda vatandaş jurnalistleriniñ sistematik taqip etilüvini qayd etken ve aydınlatqan monitoringni quvetleştirmelerini rica etti.
«Mustaqil kütleviy haber vastaları ve vatandaş jurnalistleriniñ sistematik taqip etilüvi aqqında bildirmek, faaliyetlerine yapılğan basqını toqtatmaq, Qırımda ve apiske alınğan faaller çıqarılğan Rusiyede vatandaş jurnalistleriniñ mahkeme ketişatlarınıñ aq qorçalayıcı teşkilâtları tarafından közetilüvini temin etmek içün halqara teşkilâtlarğa muracaat etmege çağıramız», – dep qoşalar «Qırım birdemliginde».
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi.
Tutulğanlardan üçü – Osman Arifmemetov, Rustem Şeyhaliyev ve Remzi Bekirov – Qırımdaki repressiyalarnı cep telefonlarına qayd etip, malümat paylaşqan edi.
Rusiye FSBsi Qırımda tintüvler keçirilgenini tasdıqladı.
Martnıñ 27-nde Aqmescitniñ Kiyev rayon mahkemesi saba tutulğan doquz qırımtatar faalini apiske aldı. Martnıñ 28-nde Aqmescitniñ rayon mahkemesi martnıñ 27-nde tutulğan daa 14 qırımtatar faalini tevqif etti.
Martnıñ 29-nda Qırımda Aqmescitteki ekinci «Hizb ut-Tahrir davası» boyunca apiske alınğan 23 qırımtatar faali Rusiyege çıqarıldı.
İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başlandı.