Keçenlerde Aqmescitte yaqalanğan «Qırım birdemligi» cemaat birleşmesiniñ koordinatorı Dilâver Memetov on eki künge tevqif etildi. Bunı advokat Rustem Kâmilev bildirdi.
«Polis hadimi onıñ yanına çapıp bardı ve qollarınlan tutıp avtobusqa ozğardı. Bu soñ belli oldı. Dava episi olıp 15 daqaiqa baqıldı. Qadı mesleatlaşma odasına bile ketmedi, qararnı birden çıqardı. O 12 künge tevqif etildi. Böylece mahkeme oturışı yekünlendi. Dilâverni artıq alıp kettiler. Biz oña şeylerini elbette berip yiberdik. Tuvğanları onen bağlıp olması içün diy dögmeli telefon berdik», – dedi advokat.
Memetov Rusiye Federatsiyasınıñ Memuriy uquq bozuvları kodeksiniñ 20.2.2 maddesine istinaden («Cemaat nizamınıñ bozuluvına sebep olğan vatandaşlarnıñ cemaat yerlerinde aynı vaqıtta kütleviy şekilde bulunması ve (ya da) areket etmesi») qabaatlana.
«Bu, insanlarnıñ tınu yolnen advokat, camaat imayecisini qarşılamaq istegenleri içün cezadır, bu, pervasız qalmağanlar ve öz destegini bildirmege istepgenler içün cezadır. Qadınlarnı bir kün tuttılar. Elmebbe maddelerge binaen memuriy tevqif olmalı, amma bu qadınlarnıñ evlerinde balaları bar, mına böyle qanunsız areket olarğa qarşı yapıldı», – dedi Kâmilev.
Haber etilgenin köre, Memetovnı Canköy muvaqqat tutuv izolâtorına alıp ketkenler.
Noyabrniñ 26-nda Aqmescitte Qırım garnizon mahkemesiniñ binası yanında Rusiye quvetçileri «Qırım birdemligi»niñ koordinatorı Dilâver Memetovnı ve Abdulla Seydametovnı yaqaladı.
Qanun qoruyıcılar koordinatorğa "tekrar olğan bozuv" aqqıda bildirip, polis bölügine alıp kettiler, sebep noyabrniñ 23-nde Edem Semedlâyevniñ qarşılap almasına kelmesi oldı. Onı polis kapitanı Aleksey Küznetsov yaqaladı.
Rusiye quvetçileri noyabrniñ 23-nde Aqmescitteki vaqtınca tutuv izolâtorınıñ binasına 12 kün memuriy apiste qalğan advokat Edem Semedlâyevni qarşılamağa kelgen faallerni tuttı. Umumen 31 insan tutuldı, aralarında qadın ve balalar bar edi. Bundan ğayrı, yanlarında matbuat kartları olğan jurnalistler «alındı».
Noyabrniñ 24-nde Rusiye kontrolindeki Qırım mahkemelerinde qırımtatar faallerine qarşı memuriy protokollar baqıldı. Aqmescitniñ Kiyev rayon mahkemesi vatandaş jurnalisti Vilen Temeryanovnı 14 künge apiske aldı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti buña qulaq asmay.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.