Qırımnıñ bank sisteması bazarertesi künü, martnıñ 31-de, bütünley çalışıp başlaycaq.
Bunı Qırımnıñ öz başına tayinlengen Serğiy Aksönov Ulyanovsk vilâyetiniñ valisi Serğiy Morozov ile körüşüvde bildirdi, yaza «İTAR-TASS».
Onıñ aytqanına köre, yarımadada bir sıra bank bölükleri açılacaq, qırımlılar Rusiye parasını alacaqlar.
Qırımdaki añlaşılmağan vaziyet bir çoq Ukraina banklarını işini toqtatmağa mecbur etti. Qırımlılarnıñ esapları blok etildi, yarım aydan berli bank kartlarından para almaq – imkânsızdır. Bundan ğayrı, olarğa depozit parası da berilmey.