Qırımdaki Roszdravnadzor organınıñ reberi Vasiliy Klimov bildirgenine köre, yarımadada Rusiye azırlağan koronavirus aşısını ealige kütleviy sürette yapmağa isteyler. Qırımnıñ Rusiye yolbaşçısı Sergey Aksenovnıñ fikirince, bu imkân eñ erte yanvar ayında olacaq. Bu aqta olar koronavirus yuqunçınıñ tarqaluvı ile küreş operativ ştabınıñ toplaşuvında dekabrniñ 2-nde ayttı.
«Bugün Qırımda vatandaşlarğa «Sputnik V» Rusiye koronavirus aşısını yapmağa azırlanalar. Vatandaşlarımızğa aşı yapılacaq logistika ve yerlerni baqamız», – dedi Klimov.
Aksenovnıñ aytqanına köre, bu aşı yapılğan insanlar «hastalıqnı daa raat keçire».
«Birinciden, tibbiyet hadimleri, Rospotrebnadzor hadimleri, ocalar, tehnik hızmetler ve hastalıq riski olğanlar aşı olacaq. Soñra kütleviy şekilde aşı yapılacaq. Kvotalar ne qadar olacaq baqacaqmız. Yanvar ayında olacaq, daa erte degil», – dedi Aksenov.
Ealini kütleviy şekilde aşılav azırlığı aqqında noyabr ayında Qırımnıñ Rusiye Sağlıq nazirligi bildirgen edi.
«Sputnik V» Rusiye aşısı sınavlarınıñ bazı iştirakçileriniñ koronavirus testi müsbet çıqtı.
Oktâbrniñ 22-nde bildirilgenine köre, Qırımda ilk tibbiyet hadimlerine Rusiye koronavirus aşısı yapılıp başladı.
Oktâbrniñ 29-nda Qırımda COVID-19 Rusiye aşısı ekimlerge yapılıp baqıldı.
Bundan evel Aqyar akimiyeti COVID-19 aşısını alğan ilk tibbiyet hadimleri aqqında esabat berdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.