Qırımnıñ Rusiye yolbaşçısı Sergey Aksenovnıñ bildirgenine köre, Keriç boğazında yanğan eki gemide 14 deñizci elâk oldı.
«Adiseniñ sebepleri aqqında bir şey aytıp olamayım. Şimdilik elâk olğan 14 kişi aqqında malümat bar, bunı saba saat doquzda Qırımnıñ fevqulâde vaziyetler naziri bildirdi. Qalğan deñizciler hastahanege daa ketirilmedi, qurtarıcı gemilerde bulunalar. Olarnı Keriç hastahanelerine ketirip, tibbiy yardım kösterecekler», – dedi o, jurnalistlerge.
Yanvarniñ 21-nde Qırım yalısında Tanzaniya bayrağı altında «Maestro» ve «Kandi» tankerlerinde patlav ve yanğın oldı.
Your browser doesn’t support HTML5
Qırım yalısında eki tanker yana, elâk olğanlar bar (video)
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Kandi» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Rusiye Tahqiqat komiteti Qırım yalısında yanğın neticesinde tankerlerde insanlarnıñ elâk olğanı sebebinden «diqqatsızlıqtan sebep eki ve daa ziyade şahısnı öldürüv» maddesi boyunca cinaiy iş açtı.
Yanğın ve patlavğa oğrağan tankerler qanunsız şekilde Suriyege şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.