Rusiye nezaretindeki Aqmescit akimiyeti, Rusiye imperetriçesi II Yekaterinanıñ “Qırımnı Rusiye terkibine alınması” manifestiniñ imzalanmasına 236 yıl olğanına bağışlap, tedbir keçirecek.
Tedbirler planı şeer memuriyetiniñ saytında derc etilgen.
Hususan, aprelniñ 19-ında Aqmescitte “imperetriçe Ulu Yekaterina abidesi ve Dolgorukov obeliskine tantanalı çeçek qoyuvı olacaq”.
Bundan ğayrı, vesiqada, merasim vaqtında Jukovskogo ve Dolgorukovskaya soqaqlarında yol areketi sıñırlanacağı bildirile. Şeer hızmetçilerine ise Yekaterina bağçasını ve obelisk etrafını cıyıştırmağa buyruq berildi.
2018 senesi avguat 3-ünde Rusiye prezidenti Vladimir Putin öz qararınen yañı hatıra kününi belgiledi - aprelniñ 19-ı, Qırım, Taman ve Kubanniñ Rusiye imperiyasına alınması Künü (1783 senesi).