Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevge qabaatlav hulâsası berildi. Bu aqta advokat Lilâ Gemeci Qırım.Aqiqat mühbirine bildirdi.
Onıñ aytqanına köre, tahqiqat 10 ay devam etti ve soñki hulâsada tahqiqat delillerniñ «standart taqımını» berdi. O, lingvistik-dinşınas ekspertizası, diniy edebiyat, daa evel mabüsler kitaplar olarğa ait olmağanını bildirgen edi, bir qaç elektron taşıyıcı ve «Qırımnıñ Sesi» gazetasınıñ bir qaç sanından ibaret.
«Bütün bu deliller standart taqım olmaqnen beraber şübhe doğura. Müvekkilerimizniñ aytqanına köre, bular yalan ola», – dep ayttı Gemeci.
Al-azırda davanı Rusiyeniñ Rostov-na-Donu şeerindeki Cenübiy okrugınıñ arbiy mahkemesine bermege azırlanalar.
«Tahqiqatçınıñ aytqanına köre, aftanıñ soñuna qadar dava mahkemede olacaq. Bundan soñ qadılar tayinlenecek, soñra ilk diñlevler belgilenecek. Tecribemizge köre, o, Qırımnıñ garnizor arbiy mahkemesinden ve tahqiqat izolâtorından video konferentsiyası şeklinde keçirile, ilk diñlevlerde kelecek mahkeme oturışuvınıñ künü belgilene, balalar ise Rostov-na-Donu şeerine avuştırılacaq, anda temel diñlevler başlanmalı. Etap Krasnodar üzerinden ola, bazı vaqıtları Armavir qoşula ve bayağı vaqıt kete», – dep ayta Lilâ Gemeci. Onıñ tahminlerine köre, müvekkileriniñ dava temelleri 2020 senesi fevral ayından evel başlanmaycaq.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.