2014 senesinden başlap Qırımtatar Resurs Merkezi, "Noman Çelebicihan batalyonı"nda iştirak etkeninde qabaatlanıp, eñ azından 66 insan yaqalanğanını qayd etti: 19 insan işğal etilgen Qırımda ve 2022 senesi kiçik aynıñ 24-nden soñ 47 insan Herson vilâyetiniñ işğal etilgen qısmında.
"Olarğa qarşı basqılar devam ete, ve, teessüf ki, siyasiy mabüslerniñ episi azat etilmey", — dep qayd eteler QRM-nde.
Böyle adiseler arasında — Rusiye akimiyeti qırımtatar batalyonında iştirak etkeninde qabaatlağan Geniçesk rayonınıñ Rıkov köyüniñ 60 yaşındaki sakini Rustem Viratiniñ ölümi. O, Rusiyeniñ Ulyanovsk vilâyetindeki Dimitrovgrad koloniyasında vefat etti.
Rusiye FSB-sı Noman Çelebicihan adına qırımtatar göñülli batalyonını 2022 senesi terroristik teşkilâtlar cedveline kirsetti.