Qoltutuv malümatı Rusiye qanunsız şekilde mahküm etken ukrayinlilerge dayanmağa küç bere, dep bildirdi Qırımtatar Milliy Meclisiniñ reis muavini, Kremlniñ sabıq reinesi Nariman Celâl «Qırımda söz serbestligine mahkeme: jurnalist işiniñ fiyatı» forumı vaqtında ayttı.
«Eñ esası, bilsinler, olarnı unutmaylar, olarnı tüşüneler, olar aqqında hatırlatalar. Bu apiste dayanmağa ve azat etilecegine ümüt etmege küç bere. Bir özüñ olmağanını is etesiñ, seni tek tuvğanlarıñ unutmay, oğrağan vaziyetiñ bir çoq insan içün müim», – dep tekrarlay Celâlnıñ aytqanlarını Ukrinform agentligi.
Meclis reisiniñ muavini qayd etkenine köre, siyasiy mabüslerge çeşit usullarnen malümat yetkizmege tırışmaq kerek: tuvğanları, advokatları, faaller vastasınen. Er angi diqqatnıñ celp etilüvi büyük emiyet taşıy, dep qayd etti o.
«Duşman em seni, em işğaldeki toplulıqnı bir cinayet yapqanına işandırmağa tırışa, böylece saña basqı yapa, psihologik küçlerini zayıflata, içindeki tayanğıçını coy dep yapa. Ve yahşı bir şey yapqanını, yahşı bir şeyge isse qoşqanını, insanlar içün emiyetli bir şeyge qoşulğanını añlasañ, saña büyük küç bere. Bunı da fikirlerine qoltutqan, yapqanlarına qoltutqan insanlardan kelgenler añlamağa yardım ete», – dep qoştı o.
İşğal etilgen Qırımda qırımtatarlarnıñ evlerinde tintüvler muntazam sürette keçirile. Uquq qoruyıcılar ve Rusiye akimiyeti olarnı «Ukrayinanen bağ» ya da «terror faaliyetinde» qabaatlaylar. Aq qorçalayıcılar ve Ukrayina akimiyeti bu qabaatlavlarnı siyasiy sebeplernen bağlı dep adlandıra.
Qırımtatar resurs merkezi bildirgeni kibi, 2017 senesinden başlap Rusiye tarafından ilhaq etilgen Qırımda 10 018 esas insan aqlarınıñ bozuluvı qayd etildi, 6 730-ı – qırımtatarına qarşı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.