Avgustnıñ 17-nde saba Aqmescit rayonınıñ Mamaq (Strogonovka) köyünde yerli imam Raif Fevziyevniñ evinde tahqiqat tedbirleri olıp keçti. Tintüvler Aqyarda ve Bağçasaray rayonında daa dört evde keçirildi.
Advokat Edem Semedlâyev uquqiy yardım köstermek içün Fevziyevniñ evine keldi, amma onı içeri kirsetmediler. Evniñ yanında bir qaç hızmet mikroavtobusı tura edi, azbarnı FSB, Ekstremizm ile küreş memrkezi, OMON hadimleri sarıp aldı.
Raim Fevziyev – medrese bitirgen yerli imam, qırımtatar faali, çoq balalı bar.
«Qırım birdemliginiñ» malümatına köre, avgustnıñ 17-nde saba Rusiye quvetçileri Raif Feyziyev, Rustem Murasov, Rustem Tairov, Cebbar Bekirov ve Zaur Abdullayevni tuttı. Murasov, Tairov, Bekirov ve Abdullayev faal olıp, siyasiy esaslı mahkeme oturışuvlarına bara, siyasiy mabüslerniñ qorantalarına yardım ete edi. Olar yaşağan yerlerinde iftar ve kütleviy tedbirlerni teşkil ete edi.
Rusiye kütleviy haber vastaları Rusiye quvetçileriniñ malümatına esaslanıp bildirgenine köre, Qırımda «Hizb ut-Tahrir davasınıñ» (Rusiyede ve işğali altındaki Qırımda yasaqlanğan teşkilât) beş tarafdarı tutuldı. Tutulğanlarnıñ ad ve soyadları yazılmay. Bu malümatnı isbatlaycaq resmiy bir tefsir yoq.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.