Eki genç qırımtatarı – Enver Çauş ve Müslim Mambetov – 20 aydan ziyade işğal etilgen yarımadanıñ Rusiye akimiyeti tarafından Aqmescitniñ SİZO-2-sinde "inkommunikado" statusında qanunsız bir şekilde tutuldı. Bu aqta Qırımtatar resurs merkeziniñ yolbaşçısı Eskender Bariyev bildirdi.
Onıñ malümatına köre, gençler 2024 senesi dekabrniñ 25-nde tutuldı. Ana-babaları balalarınıñ bulunğan yerini aman-aman eki yıl devamında bilmey edi. Olar çeşit qurulışlarğa muracaat etti, mahkemege FSB areketsizligini şikâyet etti. Tek 2026 senesi avgustnıñ 18-nde, mahkeme oturışuvından soñ, Rusiye akimiyeti gençler tahqiqat izolâtorında buluna, dep tasdıqladı.
Ekisi de Rusiye Federatsiyası Ceza kodeksiniñ 275-inci maddesine istinaden (devlet hainligi) qabaatlana. Olarğa Ukrayina mahsus hızmetlerine malümat bergenleri ve bank uyğulamalarından para yollağanları içün 12 yıldan 20 yılğa qadar apis cezası berile bile.
Müslim Mambetovğa qarşı sıñırlav tedbiri 2026 senesi avgustnıñ 28-nde mahkemede ilk sefer baqıldı. Enver Çauşnıñ oturışuvı sentâbrniñ 2-ne planlaştırıla.
Bariyevniñ aytqanına köre, soy-sopları olarnı tek Aqmescitniñ Kiyev rayon mahkemesi azbarında parmaqlıqtan bir saniyege körip oldı. 20 aydan soñ ilk "körüşüvleri" oldı. Bundan evel ne bir subet, ne bir aş, urba, gigiyena vastaları ya da ilâc yollanması oldı. "Körüşüv" kününde gençler 2024 senesi dekabr ayında tintüvlerden soñ tutulğan urbada edi.
Enver Çauş şimdi 26 yaşında (tutulğanda 24 edi), Müslim Mambetov ise 23 yaşında (tutulğanda 21 yaşında edi). Ekisi de Kezlevli, "İsmail-Bey" qırımtatarlar toplu yaşağan yerdenler. Enver evli edi ve endi-endi qoranta qurğan edi. Apiste olğanda eki qartatası ve ağası vefat etti, amma bundan haberi bile yoq.
Eskender Bariyevniñ qayd etkenine köre, bu adise Rusiye repressiv sistemasınıñ gençlerniñ ayatını yoq etkenini ve işğal etilgen Qırımda qorantalarnıñ taqdirini bozğanını köstere.