Fevralniñ 10-nda kündüz Qırımnıñ şarqında patlavlar eşitildi, dep haber etti Qırım Telegram kanalları yerli sakinlerniñ malümatına esaslanıp.
"Krımskiy veter" Telegram kanalı saat 14:57-de Keriç civarlarında eşitilgen patlav aqqında yazdı, kanal abunecileri kökte raketa izi köründi, dep haber etti. Eki daqqadan Kefede patlavlar aqqında haberler peyda oldı. Saat 15:20-de "Krımskiy veter" Keriçte kene raketa aqqında bildirdi, on daqqadan ise Şçolkino rayonında patlav aqqında yazdı.
Rusiye monitoring telegram kanallarında Qırımnıñ şarqında bir qaç mesken yerde uçucısız telükesi aqqında aytıldı.
Patlav haberlerinden aman-aman eki saattan soñ Rusiye Mudafaa nazirligi Qırımda saat 14:00-den 16:00-ğa qadar 12 dron, daa bir uçucısız Qara deñizde yoq etildi, dep bildirdi. Seslendirilgen malümatnıñ doğrulığını cenk şaraitlerinde teşkermek zor.
Ukrayina arbiyleri vaziyetni şimdilik izaatlamadı.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.