Qırımnıñ Aqmescit rayonınıñ 32 yaşında sakinine qarşı Rusiyege qarşı cenkleşmek içün Erivandan esas Ukrayınağa ketkeni içün cinaiy dava açıldı. Bu aqta ASTRA Telegram kanalı menbalarına esaslanıp yaza.
Berilgen malümatqa köre, 2022 senesi noyabr ayında qırımlı Kirill B. Soçige barıp, andan Erivanğa ketti. Şimdi «Pravıy sektor» erkânında buluna ve Rusiye ordusına qarşı cenkleşe eken.
Rusiye uquq qoruyıcıları «ekstremist teşkilâtında iştirak etüv» (Rusiye Federatsiyası Ceza kodeksiniñ 282.2 maddesiniñ 2-nci qısmı) maddesine istinaden cinaiy dava açtı, qırımlı 8 yıl apis cezasını ala bile.
Rusiye uquq qoruyıcı müessiseleri resmiy bir malümat şimdilik bermedi.
Qırımda ve Aqyarda 2014 senesinden başlap eñ azından 16 Ukrayına vatandaşı «casuslıq» ve «diversiyada» qabaatlanıp mahküm etildi. 2015 senesi Rusiye mahkemesi rejissör Oleğ Sentsovnı teraktlarnıñ teşkil etilmesinde qabaatlap, 20 yılğa üküm etti. Rusiye quvetçileri «diversiyanı «Hizb ut-Tahrir» islâm siyasiy teşkilâtınıñ vekillerine de yükley. Rusiyeniñ Ukrayınağa tam miqyaslı istilâsı başlağan soñ yarımadada cenk ile razı olmağanlarnı kütleviy surette taqip eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.