Rusiyeniñ Aqmescitteki Kiyev rayon mahkemesi Rusiye uquq qoruyıcıları tarafından terrorizmde qabaatlanğan dört qırımlı qadınnıñ apis müddetini uzattı. Bu aqta "Qırım birdemligi" advokat Emil Kurbedinovnıñ malümatına esaslanıp haber ete.
Sıñırlav tedbirini uzatuv oturışuvı martnıñ 12-nde oldı. 21 yaşında iş adamı Fevziye Osmanova, 20 yaşında student Elviza Aliyeva ve 19 yaşında student Nasiba Saidova ve çağına yetmegen beş qıznıñ anası 40 yaşında Esma Nimetulayeva iyünniñ 14-ne qadar SİZOda qalacaqlar.
Oturışuvğa tek dava iştirakçileriniñ soy-sopları keldi. Nasiba Saidovanıñ anası Dinara İyupovanıñ aytqanına köre, oturışuv qapalı edi, tuvğanları alınmadı. Qarar seslendirilgende de kirmelerine izin berilmedi. Tuvğanları tek "pek tez", "yarım saniye" olarnı körip oldı, dep qayd etti İyupova.
Advokatnıñ aytqanına köre, oturışuv vaqtında FSB tedqiqatçısı sıñırlav tedbiri deñişse, qadınlar saqlana bile, çünki Ukrayina vatandaşlıqları bar ve olar şaatlarğa tesir ete bile. Tahqiqat müvekkilleriniñ ev apsinde ne içün qalamağanını añlatmadı. İmaye mahkeme qararına itiraz etmege planlaştıra.
Hatırlatamız, qadınlar 2025 senesi oktâbrniñ 15-nde Aqyar ve Bağçasaray rayonlarındaki tintüvlerden soñ tutuldı.
Bir künden soñ Aqmescitniñ Kiyev rayon mahkemesi qadınlarnı "Hizb ut-Tahrir" islâm siyasiy firqasınıñ faaliyetinde iştirak etkeninde qabaatlap, eki ayğa apiske aldı. Nimutelayevanı terror teşkilâtınıñ faaliyetini teşkil etkeninde (Rusiye Federatsiyası Ceza kodeksiniñ 205.5 maddesiniñ 1-inci qısmı), qalğanlarını ise bu maddeniñ 2-nci qısmına istinaden (faaliyette iştirak etüv) qabaatladılar.
2025 senesi oktâbrniñ soñu-noyabrniñ başında apiske alınğanlarnıñ ana-babaları da olğan 16 qırımtatardan ibaret eyyet Moskvağa barıp, Rusiye ombudsmeni Tatyana Moskalkova, Baş prokuror ve prezident memuriyetini ziyaret etti. İnsanlar yarımada sakinleriniñ imzalı muracaatlarını ketirdi.