"Hizb ut-Tahrir" ilk qadın davası boyunca tutulğan dört qırımtatar qadını Rusiye uquq qoruyıcıları tarafından işğal etilgen Qırımdan Rostov-na-Donu ve Krasnodar tahqiqat izolâtorlarına etap etildi. Bu aqta Qırımtatar resurs merkeziniñ vekili Zarema Bariyeva haber etti.
Onıñ malümatına köre, Nasiba Saidova ve Elviza Aliyeva Rostov-na-Donu SİZO-1-ge, Esma Nimetullayeva ve Fevziye Osmanova Krasnoadr tahqiqat izolâtorına ketirildi. Bariyevanıñ qayd etkenine köre, vatandaşlarnıñ işğal etilgen topraqtan avuştırıluvı Cenevre şartnamesini boza.
Qadınlar 2025 senesi oktâbrniñ 15-nde Bağçasarayda ve Aqyar rayonında keçirilgen tintüvlerden soñ tutuldı. Olarnı Rusiyede terrorist dep tanılğan, amma çoqusı memleketlerde yasaqlanmağan "Hizb ut-Tahrir" (Rusiye Federatsiyası Ceza kodeksiniñ 205.5 maddesi) teşkilâtınıñ faaliyetinde iştirak etkeninde qabaatlaylar. Qırımda böyle davanıñ iştirakçileri qadınlar olğan ilk dava oldı. Olarnı 20 yılğa qadar azatlıqtan marum ete bileler.
Esma Nemetullayeva – Bağçasaray sakini, çağına yetmegen beş qıznıñ anası, 2023 senesi oşağan dava boyunca apiske alınğan Remzi Nemetullayevniñ ömür arqadaşı. Elviza Aliyeva – Topçıköy (Dolinnoye) köyünden student. Nasiba Saidova – imamnıñ qızı, Zalanköy (Holmovka) köyündeki bala bağçasınıñ ocası. Fevziye Osmanova Mamaşay (Orlovka) köyünde yaşay ve tükânda çalıştı.
Aqmescit SİZOsında qadınlar suvuq, dım, sıcaq suv olmağanı ve erkeklerniñ yanında baş örtülerini çıqarmağa mecbur etilgenini şikâyet etken edi. Eñ yaş, Nasiba Saidovağa, esini coyğan soñ feldşer çağırılğan edi.
Rostov-na-Donu Rusiye Cenübiy okrugınıñ arbiy mahkemesi dördüniñ de apis cezasını 2027 senesi martnıñ 28-ne qadar uzattı. 2025 senesi dekabr ayında olarnı Rusiye "ekstremistleri ve terroristleri" cedveline kirsettiler. Soy-sopları azat etilsinler talabınen 6 biñ imza topladı, amma Rusiye insan aqları vekâletlisi Tatyana Moskalkovağa ketken muracaat cevapsız qaldı.
Aq qorçalayıcılar davanı milliy ve diniy alâmetli siyasiy sebeplerden taqip olaraq köre.
Aq qorçalayıcılar qayd etkenine köre, Qırımda qırımtatar qadınlarına qarşı açılğan ilk "Hizb ut-Tahrir" davası bu oldı. Teşkilât Rusiyede yasaqlandı, amma Ukrayinada yasaq altında degil.
Rusiye akimiyeti vaziyetni izaatlamay.