Rusiye mahkemesi qırımtatar faalleri, «qırımlı musulmanlar» davasınıñ mabüsleri Rustem Murasov, Rustem Tairov, Cebbar Bekirov ve Zaur Abdullayevni daa üç ayğa nezaret altında qaldırdı. Olar iyulniñ 23-ne qadar apiste qalacaqlar, dep haber ete «Qırım birdemligi» cemaat birleşmesi.
İmaye qırımlı musulmanlarnıñ sıñırlav tedbirini ev apsine deñiştirmege rica etken edi, lâkin mahkeme prokurornıñ muracaatına qoltuttı.
«Sıñırlav tedbirleri uzatıldı. Amma balalar dayana, tebessüm eteler. Er kesni Ramazannen hayırlay, oraza tutalar, ümüt coymaylar. Men aqayımnı yahşı körip raatladım», – dep tarif etti Emine, Zaur Abdullayevniñ ömür arqadaşı.
2022 senesi avgustnıñ 17-nde Qırımda Aqmescit, Bağçasaray rayonlarında ve Aqyarnıñ Balıqlava, Nahimov rayonlarında qırımtatarlarnıñ evlerinde kütleviy tintüvler keçirildi. Tahqiqat tedbirlerini FSB, Ekstremizm ile küreş merkezleri ve OMON hadimleri keçirdi.
Tahqiqat tedbirleri neticesinde beş kişi tutuldı. Aqyar şeeriniñ Nahimov rayonında FSB hadimleri faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında faal Zaur Abdullayevni alıp ketti.
«Qırım birdemligi» cemaat birleşmesi advokat Aleksny Ladinniñ malümatına esaslanıp, tutulğan qırımtatarlar «terror teşkilâtını qurğanından ve iştirak etkeninden» şübheli sayıla.
Sabıq Ukrayına ombudsmanı Lüdmila Denisova «qanunsız» dep adlandırdı ve tintüvlerden soñ tutulğan qırımtatarlarnıñ apis cezalarını lâğu etmege talap etti.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen tintüvler ve tutuvlarnen bağlı cinaiy tahqiqat başlatıluvı aqqında bildirdi.
Ukrayına prezidenti Volodımır Zelenskıy tintüv ve tutuvlarnı «insan aqlarınıñ bozuluvı» dep adlandırdı, Ukrayına Tış işler nazirligi Rusiyege qarşı narazılıq bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.