«Podil nezlamnıy» festivaliniñ iştirakçileri qırımlı siyasiy mabüslerge 59 mektüp yazıp, «Serbest Qırımğa mektüpler» informatsion kampaniyasına qoltuttı. Bu aqta Ukrayinanıñ vaqtınca işğal etilgen topraqlarnıñ reintegratsiya meseleleri nazirligi haber ete.
«Bir künde festival iştirakçileri Kyivde qırımlı siyasiy mabüslerge 59 mektüp yazdı. «Serbest Qırımğa mektüpler» aktsiyasına qoltutuv levhası festivalniñ Qırım alanında çalıştı», – dep aytıla haberde.
Qayd etilgenine köre, aktsiyanıñ maqsadı cemiyetke işğal altındaki yarımadada Ukrayinağa qoltutqan vatandaşlarnıñ qanunsız mahküm etilgenini hatırlatmaqtır. Aktsiya çerçivesinde istegen er kes qırımlı siyasiy mabüslerge qoltutuv sözlerini ayttı.
«Serbest Qırımğa mektüpler» aktsiyası yılnıñ soñuna qadar uzatılğan edi.
Fevralniñ 19-nda Ukrayınada «Serbest Qırımğa mektüpler» aktsiyası başladı. Teşebbüs ukrayınalılar ve diger memleketlerniñ sakinlerini Rusiye qanunsız tutqan qırımlı siyasiy mabüslerge mektüp yazmasına çağıra. Maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek. Aktsiya mayısnıñ 19-na qadar devam etecek, dep planlaştırılğan edi.
Ukrayına Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-nde Rusiyede 208 qırımlı siyasiy mabüs tutula, 125-i - qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.