Faal Marlen Mustafayevnen beraber sekiz qırımtatarı işğal etilgen Qırımdan 2000 kilometr mesafede Rusiye apishaneleriniñ sert şaraitlerinde tutula. Olar Rusiye Federatsiyasınıñ Ulyanovsk vilâyetiniñ Dmitrovgrad şeerindeki apishanede bir kamerada tutula, dep qayd ete Mustafayevniñ soyu Emine Suleymanova Qırımtatar resurs merkezine.
Bu qırımtatarlar Rusiye mahkemesi tarafından «terror faaliyetini teşkil etüv» (Rusiye Federatsiyası Ceza kodeksiniñ 205.5 maddesiniñ 1-nci qısmı) ve «akimiyetni zornen zapt etüv azırlığı» (Rusiye Federatsiyası Ceza kodeksiniñ 278-inci maddesi, 30-ıncı maddesiniñ 1-inci qısmı) maddelerine istinaden mahküm etilgen edi. 8-inden iç biri Qırım işğalinden evel mahküm etilmegen edi, dep qayd ete Qırımtatar resurs merkezi.
Berilgen malümatqa köre, azatlıqtan marum etüv yerlerinde tutuv şaraitleri zor. Aş az ve yeterli degil, soy-sopları sıñırlı sayıda bir şeyler yollamağa mecbur, yılda 30 kg ola bile.
«Marlenniñ tiş problemleri bar edi, Saratovdan iş ekimini çağırıp oldıq. Añlaşma tizip, para töledik, amma pek paalı çıqtı. Yardım etmek içün başqa qorantalar da qoşuldı, amma er kesniñ imkânı yoq», – dep tarif etti Emine.
Rostov-na-Donu şeerindeki Cenübiy okrugınıñ arbiy mahkemesi Qarasuvbazar şeerinden qırımtatar faali, «Qırım musulmanları davasınıñ» mabüsi Marlen Mustafayevni 17 yılğa üküm etti. Mustafayev 17 yıl sert rejimli koloniyada qalmasına üküm etildi, birinci 3 yılı apishanede keçecek ve 1 yıl 6 ay müddetinen sıñırlanacaq.
Marlen Mustafayev – siyasiy mabüslerniñ mahkemelerine barğan ve qorantalarına yardım etken qırımtatar faali. Apiske alınmazdan evel o, maşina tamirinen oğraşqan edi.
Mustafayev 2022 senesi fevral ayında Rusiye tintüvlerinden soñ tutuldı. Qırımnıñ bir qaç rayonında Rusiye havfsızlıq küçleri dört insannı tuttı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terroristik olaraq tanılğan, amma dünyanıñ bir çoq memleketinde milliy qanunlar seviyesinde sıñırlavsız faaliyet köstergen «Hizb ut-Tahrir» islâm siyasiy firqasında iştirak etmekte qabaatlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.