Avropa Jurnalistler Federatsiyası dekabrniñ 30-nda Avropa memleketlerinde apiste bulunğan jurnalistlerniñ cedvelini yañartıp, anda qırımlı jurnalistlerni qoştı. Bu aqta Ukraina jurnalistleri milliy birliginiñ yolbaşçısı Serğiy Tomilenko bildirdi.
«Ukraina jurnalistleri Milliy birliginiñ teklifinen işğal etilgen Qırımnıñ statusına diqqat ayırıldı, andaki apishanelerde al-azırda üç jurnalist, hususan Azatlıq Radiosınıñ frilanseri Vladislav Yesipenko tutula. Apiske alınğan media hadimleriniñ cedvelini Avropa Jurnalistleri Federatsiyası monitoringine ve Federatsiya azalarından kelgen malümatqa esaslanıp tertipke ketire. Yañılıq Avropa Jurnalistleri Federatsiyasınıñ saytında bar», – dep aytıla haberde.
Avropa Jurnalistleri Federatsiyasınıñ malümatına köre, yılnıñ soñunda Avropada 95 jurnalist azatlıqtan marum etildi.
Mabüslerniñ sayısına köre Beyazrusiye (32 media vekili) ve Rusiye (22 media vekili) lider ola. Ukraina jurnalistler milliy birliginiñ teklifinen ilk sefer bu cedvelge apiske alınğan qırımtatar vatandaş jurnalistleri de kirdi – 10 insan (bir yıl evelsi tek üç jurnalist kirsetilgen edi) ve Vladislav Yesipenko.
«Bu yıl Brüsseldeki Avropa Jurnalistleri Federatsiyasınıñ merkezinde çalışqan zenaatdaşlarımız Rusiye mahkemege oğratqan ve esir tutqan 10 vatandaş jurnalistiniñ jurnalist statusını tanıdı. Diplomat ve memurlar içün halqara jurnalist birdemligi mehanizmi kerek. O, müim, kerekli ve faydalı, bunı esirlikten azat etilgen ukrainalı jurnalistler Roman Suşçenko, Stanislav Aseyev ve Mıkola Semenanıñ taqdirleri isbatlay», – dep qayd etti Tomilenko.
Ukraina jurnalistleri milliy birliginiñ aq qorçalayıcılardan «Qırım birdemligi» areketinen bağlı alğan malümatına köre, sekiz qırımlı vatandaş jurnalisti Rusiye Federatsiyasında apiste tutula – Rostov-na-Donuda ve Rostov vilâyetinde (Marlen Asanov, Osman Arifmemetov, Remzi Bekirov, Ruslan Suleymanov, Rustem Şeyhaliyev, Server Mustafayev, Seyran Saliyev, Timur İbragimov). Eki vatandaş jurnalisti ve Vladislav Yesipenko işğal altındaki Qırımnıñ apishanelerinde tutula (Asan Ahtemov ve Amet Suleymanov, sağlıq vaziyeti sebebinden ev apsinde buluna).
Dekabrniñ 28-nde Ukraina jurnalistleri milliy birliginiñ matbuat merkezinde UJMBniñ apiske alınğan qırımlı vatandaş jurnalistleri ve qorantalarınen birdemligi olaraq «Fokusta – Qırım» Ukraina jurnalistleri birliginiñ teşebbüsi çerçivesinde «Vatandaş jurnalistleri müimdir!» fotoresimler sergisi açıldı.