Rusiye Federatsiyasınıñ Mudafaa nazirligi oktâbrniñ 12-nden aqşamdan ve oktâbrniñ 13-nde saat 8:00-ge qadar Qırım eñ az 73 dronnıñ ücümine oğradı. Bu malümat içtimaiy ağlardaki müessise saifelerinde berile.
Anda bu uçucısızlarnıñ yoq etilüvi aqqında haber etile. Bundan ğayrı, Rusiye Mudafaa nazirligi Rusiye Ava mudafaa quvetleri Qara deñizde 34 uçucısıznı yoq etti, dep bildire. Umumen qaç dron uçurıldı anda aytılmadı, müessise bir delil köstermedi. Rusiye Mudafaa nazirligi zararlar aqqında da yazmay.
Yerli Telegram kanalları uçucısızlarnıñ ücüminden soñ yanğın çıqqan Kefeden ğayrı Aqmescit rayonında da yanğın bar, dep haber ete. «Krımskiy veter» Telegram kanalı abunecileriniñ malümatına esaslanıp, 300 kV «Aqmescit» ast stantsiyası yanadır, dep yaza.
«Yanğın tumanı Mamaqqa kete, nefes almağa çare yoq, dep haber ete yerli sakinler. Bir qaç köyden insanlar Aqmescitke işke barıp olamay, çünki yol qapalı. Şeer avtobuslarınıñ areketleri deñiştirildi», – dep aytıla haberde.
Rusiye akimiyeti bu adise aqqında bildirmey, seslendirilgen malümat ise teşkerilmeli, cenk vaziyetinde bunı yapmaq zor. Ukrayina arbiyleri şimdilik bir şey izaatlamadı.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.