Aprelniñ 12-nde Kreml kontrolindeki Qırım Yuqarı mahkemesiniñ Qırımda ğıyabiy şekilde mahkeme etilgen Qırımtatar Milliy Meclisiniñ reisi Refat Çubarovnıñ dava oturışuvında imaye tarafı delillerini kösterdi, dep bildirdi tayin etilgen advokat Aleksandr Osokin Qırım.Aqiqatqa.
Onıñ aytqanına köre, sorğuda zarar körgenlerden biri Refat Çubarov kim olğanını bilmey, dep bildirdi.
«Sorğu vaqtında zarar körgen kişi Refat Çubarovğa qarşı bir iddiası olmağanını ayttı. O, onıñ kim olğanını bile bilmey. Böylece, 2014 senesi fevralniñ 26-nda Devlet şurası ögünde ezüvni kim teşkil etkenini de bilmey», – dep tarif etti Aleksandr Osokin.
Advokatnıñ bildirgenine köre, oturışuvda imaye tarafınıñ üç şaatı sorğuğa çekildi.
«Şaatlar, olğan ezüv ve Refat Abdurahmanoviçniñ bütün areketleri mitingniñ eki tarafında da olğanlarğa qarşı bir zorbalıq olmasına yol bermemek içün yapıldı, dep qayd etti», – dep haber etti Çubarovnıñ advokatı.
Refat Çubarovnıñ tayin edilgen advokatı Aleksandr Osokin, 2021 senesi aprelniñ 12-si
Osokin aytqanına köre, şaatlar 2014 senesi fevralniñ 26-nda «avtobuslarnen kelgen gruppalar» bar edi ve «ezüvge olar yol açtı», dep ayttı.
Bundan ğayrı, şaatlar olıp keçken vaqialarda qırımtatarlarnıñ bir qabaatı olmağanını bildirdi.
Nevbetteki oturışuv aprelniñ 14-ne saat 9:00-ğa planlaştırıldı. İmaye tarafı delillerini köstermege devam etecek.
Qırımtatar Milliy Meclisiniñ reisi Refat Çubarovnıñ bunıñnen bağlı açıq izaatları yoq.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
SEE ALSO: “Rusiye ögünde kollaps ve dağıluv telükesi peyda olmalı”: Çubarov Qırımnıñ işğalden azat etilüvi ve qırımtatarlarnıñ meseleleri aqqındaBıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.