Kreml kontrolindeki Qırım Yuqarı mahkemesi qırımlı Yunus Maşaripovnıñ qabaatlavından patlayıcı maddelerniñ qanunsız yapıluvını (Rusiye Ceza kodeksiniñ 223.1 maddesi) çıqardı. Bu aqta Maşaripovnıñ advokatı Aleksey Ladin Qırım.Aqiqat mühbirine bildirdi.
«Hatırlatam, temyiz mahkemesi Qırım Yuqarı mahkemesiniñ ükmüni yañı baqıluvğa qaytardı. Bugünki mahkeme oturışuvında qadılar Yunus Maşaripovnıñ qabaatlavından patlayıcı maddelerni qanunsız azırlav ve patlayıcı maddelerni satın aluv aqqında bir qısımnı çıqardı. Faqat Yunus Maşaripovnı zorlap tedaviylemek qararını mahkeme deñiştirmedi. Ve Maşaripov Volgograddaki qapalı psihiatrik hastahanesinde mecburiy tedaviylevde bulunacaq», – dep tarif etti Ladin.
Advokatnıñ bildirgenine köre, imaye tarafı istinaf mahkemesiniñ qararını temyiz qurulışında tekrar şikâyet etmege niyetlene.
«Qırım Yuqarı mahkemesiniñ qararına qarşı tekrar temyiz şikâyetini berecekmiz. Ve şikâyetimizniñ yañıdan baqılmasını bekleycekmiz», – dep qoştı advokat.
Martnıñ başında Rusiyeniñ Krasnodar Dördünci temyiz mahkemesi patlayıcı işlep çıqarğanında qabaatlanğan qırımlı Yunus Maşaripovnıñ cinaiy davasını tekrar baqılmasına yollamağa qarar aldı.
Maşaripov 2017 senesi sentâbr ayında tutulıp apiske alındı. Onıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.