Sentâbrniñ 1-nden başlap Rusiyede ve işğal etilgen Qırımda baqılmağan olaraq tanılğan topraq damartılarını almaq içün yañı kriteriyler işke tüşürile. Bu aqta RİA Novosti agentligi Rusiye Federatsiyası Devlet dumasınıñ qurucılıq ve mesken-kommunal hocalıq komitetiniñ reis muavini Sergey Kolunovnıñ malümatına esaslanıp haber ete.
Kolunovnıñ aytqanına köre, tutıp almaq içün sebepler: inşaatlarnıñ olmaması ve olarnıñ belgilengen müddet içinde qayd etilmemesi; topraq damartısınıñ yarısında çöplük ya da qalımtılar; binalarnıñ qazaiy alı; basqan top, saibi çezmegen «diger bozuvlar».
Onıñ qoşqanına köre, topraqnıñ tutıp alınması «eñ soñ qarar» olacaq. Başta organlar topraq damartısını teşkerip, saibine añlatmağa ve bozuvlarnı çezmege imkân berecek. Bir şey yapılmasa, dava mahkemege berilecek, anda ise tutıp aluv esnası başlatıla bile.
Ukrayina Milliy tirenüv merkezi Rusiye akimiyetiniñ qararını «yañı topraq aluvınıñ azırlığı» dep adlandırıdı. «Artıq er bir azbar ya da sayfiye telüke altında. Bu abadanlaştıruv meselesi degil – bu bir reyderlik ve kremllilerniñ faydasına yañı areketler», – dep aytıldı.
Rusiyeniñ Ukrayinağa qarşı büyük cenki vaqtında Rusiye akimiyeti mulkni tutıp aluv esnasını quvetleştirdi. 2023 senesi Konstantinov 2500-den ziyade obyektni «devletleştirüv» aqqında bilirdi. Bu cedvelge iş adamı İgor Kolomoyskiyniñ aktivleri, Qırımtatar Milliy Meclisiniñ binası ve Ukrayina prezidentiniñ ömür arqadaşı Ölena Zelenskayanıñ dairesi kirdi.
Ukrayina ve halqara toplulıq bu areketlerni halqara uquqnı bozğan mulkni qanunsız aluv olaraq tanıylar. Kyiv Qırım Ukrayina kontroline qaytarılğan soñ bütün «devletleştirüv» qararları sıfırlanacaq, mulk ise saiplerine qaytarılacaq, dep qayd etken edi.
Rusiye akimiyeti «devletleştirilgen» mulk satışından kâr etilgen sermiya Ukrayinağa qarşı cenk iştirakçilerine qoltutmaq içün sarf etilecek, dep bildire.