Qırımda Ukrayına mahsus hızmetleri içün «strategik müim obyektler aqqında topladı» manaçığınen yerli sakin tutuldı, dep bildire Rusiye uquq qoruyıcıları.
Qırımdaki Rusiye İç işler nazirligi idaresiniñ haberine köre, Aqmescit rayonınıñ 28 yaşında sakin ayaqmaşinanen yürip, «strategik obyektlerniñ» videosı ve fotoresimlerini yaptı.
Yanvarniñ 12-nde evinde tintüv keçirildi, «bir qaç cep telefonı, uzaqtan közetüv mini-kameraları, yasaqlanğan malümat olğan bilgisayar tehnikası, malümat taşıyıcıları» ve elnen yapılğan uçucısızlarğa oşağan ve patlayıcı cihazlarğa oşağan eşyalar alındı.
Al-azırda tutulğan kişi patlayıcı maddeni saqlağanında (Rusiye Federatsiyası Ceza kodeksiniñ 222.1 maddesiniñ 1-inci qısmı) qabaatlana. Adı ve soyadı aytılmay, fikri ise bildirilmey. Ukrayına mahsus hızmetleri bu malümatnı izaatlamadı.
Qırım ve Aqyarda 2014 senesinden başlap eñ az 16 Ukrayına vatandaşı «casuslıq» ve «diversiyalarda» qabaatlanıp mahküm etildi. 2015 senesi terakt azırlanuvını teşkil etüv qabaatı boyunca Ruiye mahkemesi Oleg Sentsovnı 20 yılğa üküm etti. Rusiye uquq qoruyıcıları «Hizb ut-Tahrir» teşkilâtınıñ vekillerini böyle «diversiyalarda» qabaatlağan ediler. Rusiyeniñ Ukrayınağa qarşı büyük istilâsından soñ yarımadada cenkke qarşı çıqqanlar taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.