Sentâbrniñ 21-ne keçer gecesi işğal etilgen Qırımda Rusiye arbiyleriniñ mevzilerine ücüm etildi, dep yaza Astra Telegram kanalı Rusiye Federatsiyasınıñ acele hızmetlerindeki menbalarına esaslanıp.
Telegram kanalınıñ malümatına köre, Aqşeyh rayonında eki dron Smail Bay (Voloçayevka) köyü yanında ava mudafaasınıñ 31-inci diviziyanıñ mobil noqtasınıñ avtokolonnasına darbe endirip, radiolokatsion tertibatını yoq etti.
Aqmescit rayonınıñ Beş Terek (Donskoye) köyü civarlarında uçucısız «Pantsir-S1» zenit raketa-top kompleksine zarar ketirdi. Yaralanğan bir arbiy aqqında haber etile.
Saq rayonında, Ayırça (Vitino) köyünde, tahminlerge köre, «Neptun» raketalarınen endirilgen eki darbeden soñ 31-inci diviziyanıñ qışla, klub, oquv korpusı ve aşhane binaları zarar kördi.
Rusiye Federatsiyasınıñ Mudafaa nazirligi sentâbrniñ 21-ne keçer gecesi Qırımda 12 uçucısız, Qara deñizde ise 4 uçucısız urıp tüşürildi, dep bildirdi.
Muarririyet bu malümatnı mustaqil şekilde teşkerip olamay. Amma 2022 senesinden başlap Qırım aman-aman er kün uçucısız ve raketalarnıñ ücümlerine oğray. Rusiye akimiyeti arbiy obyektlerge ücüm yapılğanını inkâr ete.