Rusiye kontrolindeki Bağçasaray rayon mahkemesi Alma Tamaq (Pesçanoye) köyündeki «Atmosfera» qavehanesiniñ müdirine Verka Serdüçkanıñ yırını qoyğanları içün 300 biñ ruble para cezasını berdi. Bu aqta «Krımskiy SMERŞ» Rusiyege qoltutqan Telegram kanalı haber ete.
Berilgen malümatqa köre, iyulniñ 26-nda diceyniñ qavede qoyğan yırı Rusiye Silâlı quvetlerini ve devlet siyasetini «itibardan tüşüre». Mahkeme adiseni Rusiye Federatsiyası Memuriy uquq bozuvları kodeksiniñ 20.3.3 maddesiniñ 1-inci qısmına istinaden tasnif etti.
Protokolda yırnıñ manası «Rusiye Federatsiyası Silâlı quvetleri ve umumen Rusiyeniñ siyasetini itibardan tüşürmekten» ibaret, dep aytıla. Qavehane müdiri qabaatını tolusınen tanığan eken.
Telegram kanalınıñ malümatına köre, diceyniñ davası daa baqıla.
Belli olğanına köre, Rusiye uquq qoruyıcıları diceyni tuttı – 35 yaşında Pavel Korotkiy «Ğulânoçka» yırını qoyğan, anda ise «o qadar eglensek, Ukrayina daa ölmegen» dep aytıla.
Soñra internette bir video peyda oldı, anda o, afu soray ve Rusiye siyasetine ve «SVO» degen areketlerge qoltuta, dep ayta.