Qırımda martnıñ 4-nde kün devamında çeşit rayonlarda patlavlar oldı, dep yaza Qırımnıñ telegram kanalları, Rusiye Federatsiyasınıñ Mudafaa nazirligi ise dron ücümi aqqında haber etti.
Qırımda patlavlar aqqında tahminen saat 12:00-de haber etildi. "Krımskiy veter" telegram kanalı yerli sakinlerniñ malümatına esaslanıp, saat 12:19-da Qırımnıñ Saq rayonında patlav, saat 12:20-den başlap Keriçte patlavlar oldı, dep bildirdi. Saat 13:11-de Aqmescitniñ Yağmurça (Fontanı) qasabasında ve şeerge yaqın Sarabuz qasabasında eşitilgen patlavlar aqqında haber etildi. Soñra kene Saq rayonı ve Keriçte Azaq deñizi tarafından patlavlar aqqında haber etildi. Bundan ğayrı, "Belbek" Rusiye arbiy uçaq alanı rayonından da haber keldi.
Rusiye akimiyeti bu haberlerni izaatlamadı. Tek saat 17:30-da Rusiye Mudafaa nazirligi Rusiye ava mudafaası saat 8:00-den 16:00-ğa qadar Qırımda 27 uçucısıznı, daa 16 uçucısıznı Azaq deñizinde ve üçüni Qara deñizde urıp tüşürdi, dep bildirdi. Bunı tasdıqlağan bir beyanat olmadı. Tüşürilgen dronlarnıñ sayısını da müessise aydınlatmadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.