Qırımda 2017 senesinden berli esas insan aqlarınıñ 9006 kere bozulğanı qayd etildi. Çoqusı qırımtatarlarnen bağlı, dep haber ete Qırımtatar resurs merkezi.
«Umumen 2017-2023 seneleri işğal etilgen Qırımda esas insan aqları 9006 kere bozuldı, 6365-i – tamır qırımtatar halqınıñ vekillerine qarşı oldı», – dep aytıla haberde.
2017 senesinden 2023 senesine qadar aq qorçalayıcılarnıñ yarımadada qayd etkenleri:
- 458 tintüv – qırımtatarlarğa qarşı 325
- 1504 tutuv – qırımtatarlarğa qarşı 1210
- 1460 sorğu – qırımtatarlarğa qarşı 1100
- 1446 apis cezası – qırımtatarlarğa qarşı 1054
- 3180 adaletli mahkeme aqqı bozuldı – qırımtatarlarğa qarşı 1999
- 584 sağlıq aqqı – qırımtatarlarğa qarşı 384
- 374 etap – qırımtatarlarğa qarşı 293.
Qırım.Aqiqat qırımtatarlar Qırımdan kene nasıl quvulğanını, Rusiye qırımtatarlarnı kene evsiz qaldırğanını levhada kösterdi. Film qaramanları ikâyelerini, Rusiye işğal etken Qırımdan nasıl ketkenlerini, ne yaşağanlarını, ne içün qalıp olamağanlarını, şimdi qayda ve nasıl yaşağanlarını ve Qırımğa qaytıp olacaqlarını tarif etti.
Your browser doesn’t support HTML5
«Sessiz sürgünlik» Qırım.Aqiqatnıñ (Azatlıq Radiosınıñ leyhası) vesiqalı filmi. Treyler
Olarnı apiske ala, işkencege oğrata, taqip ete ediler. Rusiye apsine oğramaları mümkün edi. 1944 senesiniñ adiseleri tekrarlana: sovetler akimiyeti qırımtatarlarnı yük vagonlarında çıqarğan edi, şimdi Rusiye tamır halqnı tuvğan evlerini terk etmesine zorlay.
Film premyerası dekabrniñ 10-nda «Suspilne» telekanalınıñ regional ağında oldı. Dekabrniñ 13-nde büyük premyerası Azatlıq Radiosınıñ YouTube kanalında olacaq. Şu künü «Sessiz sürgünlik» Ukrayına milliy telemarafonında kösterilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.