Qırımda tibbiy hadimlerniñ zenaat birligi areketiniñ faali ve vatandaş jurnalisti İrına Danilovıç apiske alındı. Bu aqta ZMINA aq qorçalayıcı merkezi ve Ukraina prezidentiniñ Qırım Muhtar Cumhuriyetindeki daimiy temsilciligi mayısnıñ 2-nde menbalarına esaslanıp bildirdiler.
Qırım.Aqiqat alğan malümatqa köre, İrına Danilovıçnıñ aprelniñ 29-nda saba saat 6-larda Köktebelden Oy Quyuğa (Vladislavovka) işten qaytqanda uquq qoruyıcı organlarnıñ hadimleri tarafından tutulğanı tahmin etile. Saba saat 10-larda Oy Quyuda, İrına ana-babasınen yaşağan evde tintüv keçirildi. Advokat Ayder Azamatovnıñ Qırım.Aqiqatqa haber etkenine köre, tintüvde altı insan bar edi: eki şaat ve dört balaklavalı hadim. Tehnika, kitaplar, vesiqalar ve çalışmağan soyları da olğan cep telefonları alındı.
İrina Daniloviç
Evde İrınanıñ babası bar edi. Oña mahkemeniñ tintüv keçirüv qararı kösterildi, amma kopiyası qaldırılmadı. Babasınıñ aytqanına köre, İrına Danilovıç 10 künge apiske alındı. «Hadimlerden biri, babası aytqanına köre, ükümetnen alâqası olmağan teşkilâtnıñ gizli olmağan malümatnı bergeni içün 10 künge tutulğanını ayttı», – dep ayta Ayder Azamatov.
Ayder Azamatov
Operativciler bütün cep telefonlarını evden çıqarğan soñ qorantanıñ bağlanmaq içün bir imkânı qalmadı. İrına Danilovıçnıñ tutulğanından uquq qoruyıcılar tek mayısnıñ 2-nde haberdar oldı. «Tanışları sorap başladı, İrina qayda dep, ana-babası ise cep telefonları alınğanı içün telefon etip olamağan edi», – dep ayta advokat.
İrına Danilovıçnıñ saifesine birisi mayısnıñ 2-nde üyle saatlarında kirdi, apiske alınganından 3 kün keçken soñ. Bütün tehnikasını uquq qoruyıcılar aldı. Skrin
Ayder Azamatov Danilovıçnıñ imayecisi ola, çünki imzalanğan añlaşmaları bar. Faqat müvekkiliniñ bulunğan yerini ne advokatı, ne de İrına Danilovıçnıñ ana-babası bilip olamay.
Mayısnıñ 2-nde İrina Danilovıçnıñ ailesi poliske çağırıldı. Qırımnıñ Rusiye polis hadimleri kelip sorav keçirdi. Advokat Ayder Azamatov Danilovıçnıñ ğayıp oluvınen bağlı muracaatnı Qırımnıñ Rusiye prokuraturasına yazdı.
«Qayda tutulğanını bilmeymiz. Onı başta Sudaq şeeriniñ vaqtınca tutuv izolâtorında qıdırdıq, anda yoq. Qarasuvbazar, Aqmescit, Saq, Kezlev, Aluşta ola bile – Qırımnıñ er angi noqtasında tutulması mümkün. Polis, prokuratura hadimleri eñ azından bir şey ögrenip, bulunğan yerini ve sebebini haber eterler, dep ümüt etemiz», – dep bildirdi Azamatov.
İrına Danilovıç Beyazrusiyeniñ Vitebskinde doğdı, Rusiyeniñ Belgorod şeerinde yaşadı. Rusiye işğalinden evel Ukrainanıñ Qırımına köçti, 2014 senesiniñ başında Ukraina vatandaşlığını aldı. Qırımda İrına Danilovıç sağlıq sistemasında çalıştı, tibbiy hadimlerniñ zenaat birligi areketinde iştirak etti. Kefede «Ekimlerniñ birligi» yerli zenaat birligi teşkilâtı qurulğan soñ ve tibbiyet hadimleri Putin vade etken, amma regional akimiyet tarafından bütünley berilmegen «kovid parasını» talap etken soñ, İrına ve zenaatdaşları idariy basqığa ve işten boşatuv telükesine oğradı. O vaqıt Danilovıç Kefe tibbiy birleşmesiniñ narkotik hızmetinde çalışa edi, amma onıñ ve bir qaç işdeşiniñ «isyanından» soñ onı işten çıqarğanlar, ve atta alğan kovid parasınıñ bir qısmını mahkeme tahqiqatınen qorquzıp qaytarmağa talap etkenler.
Daniloviç cemaat faaliyetini toqtatmadı. Soñki vaqıtları vatandaş jurnalisti olaraq Qırım sağlıq sistemasınıñ problemlerini aydınlattı. İçtimaiy ağlarda saqlıq hadimleriniñ aqlarını qoruv aqqında yaza ve bu saanıñ problemlerini aydınlata edi. Yarımadada olğanlarnı Qırım, Rusiye ve Ukraina kütleviy haber vastaları içün izaatlay edi. Hususan, Qırım.Aqiqat içün. Koronavirus pandemiyasınıñ eñ zor zamanlarında Qırımnıñ sağlıq saasındaki kerçek vaziyet aqqında tarif etken pek az Qırım tibbiyet hadimlerinden biri edi. Danilovıç em zenaatdaşlarınıñ aytqanlarından, em özü körgen ve qorantasınıñ tecribesine esaslanıp, Qırım sağlıq nazirliginiñ ciddiy hataları aqqında tarif etken edi. 2021 senesi babası yürek ameliyatından soñ yatqan İslâm Terek rayon hastahanesinde koronavirusqa oğradı.
Tenqit çoq olsa da, bu hastahaneniñ baş ekimi tek bir qaç kere hastahanege yatqızılmağan ağır ayaqlı Yelizaveta Bugay koronavirustan ölgen soñ işten boşatıldı.
Qırım.Aqiqat vaziyetni taqip etmege devam ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Sergey Mokruşin, Qırım.Aqiqat alıp barıcısı