Aq qorçalayıcılar hatırlatqanı kibi, Qırım ilhaqqa oğrağan soñ, yarımadadaki Ukrayina devlet akimiyeti öz faaliyetini toqtattı, şunıñ içün yarımada işğalden azat etilgen soñ olarnı ğayrıdan başlatmaq vazifesi Qırım Muhtar Cumhuriyeti ve Aqyarda idare sistemasını ğayrıdan başlatmaq içün mehanizmlerniñ işlep çıqarılmasına siltem oldı, dep haber ete ZMINA insan aqları merkezi.
2024 senesi mart ayında Ukrayina Yuqarı Radasında «Qırım Muhtar Cumhuriyeti ve Aqyar şeerinde cemaat akimiyetini tiklevniñ hususiyetleri aqqında» Ukrayina Qanunına deñişmeler kirsetilüvine dair» ükümet qanun leyhası qayd etildi.
«Leyhada Qırım Muhtar Cumhuriyeti ve Aqyar şeeri arbiy idaresiniñ teşkil etilmesi içün esas yaratqan «Askeriy nizamnıñ uquqiy rejimi aqqında» Ukrayina Qanunına deñişmeler kirsetilmesi teklif etile. Bundan ğayrı, qanun leyhasında qasaba ve regional arbiy idarelerniñ arbiy idareleri teşkil etilmesi mehanizmi, olarnıñ arasında özara tesir tertibi, memur adamlarnı tayinlevi közde tutula, em de er bir memuriy-territorial seviyedeki arbiy idarelerniñ vazifeleri belgilene. Qanun leyhasına aynı vaqıtta devlet akimiyet organlarında ve yerli ükümet organlarında saylanğan vazifelerde bulunğan şahıslarnıñ, olarnıñ mesülietli adamlarınıñ ve devlet organlarınıñ devlet hızmetçileriniñ vazifeleri toqtatılğanı da közde tutula», — dep qayd eteler aq qorçalayıcılar.
Olarnıñ fikirince, bu qanun leyhasını qabul etüv «Ukrayina topraq bütünligini tiklev ve işğalden azat etilgen Qırım yarımadasında vatandaşlarnıñ aq-uquq ve serbestliklerini teminlev yolunda müim bir adım olacaq».
Muracaatnı ZMINA İnsan aqları merkezi, KrımSOS cemaat teşkilâtı, «Tesir gruppası» cemaat holdingi, «Donbass SOS» cemaat teşkilâtı, «Vostok SOS», «İmaye aqqı» ve Stabilization Support Services fondları imzaladı.
Sentâbrniñ 3-nde belli olğanına köre, Ukrayinada Qırımda arbiy memuriyetlerniñ quruluvını közde tutqan qanun leyhası ilk oquvğa azır. Qanun leyhası Yuqarı Radanıñ milliy telükesizlik, mudafaa ve istihbarat meseleleri komitetiniñ toplaşuvında baqıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.