İşğal etilgen Qırımda Rusiye yolbaşçısı Sergey Aksenov mesele tez çezilir dep vade etse de, A95 benzini öyle de yoq. Bu aqta yerli faal gizli qalmaq şartınen Qırım.Aqiqatqa tarif etti.
Onıñ aytqanına köre, regionnıñ yaqarlıq stantsiyalarında tek 95ULTRA ve A100 benzinleri peyda oldı, amma eñ çoq A95 ve A92 talap etile.
«Aksenov kene sözüni tutmadı. Sentâbrniñ 25-nde o, qırımlılarnı bir-eki künde A95 benzin meselesi çezilir, dep işandırdı. Sentâbrniñ 28-i oldı, amma bu benzin alâ daa yoq. Qırımnıñ Rusiye yolbaşçısı bütün yayınlarda tek resmiy malümatqa inanmaq kerek, dep aytmaqtan boldurmay, amma özü kene yañlış malümat bere, insanlar ise işanıp, bir-eki künden benzin olur dep, qalğanını qullandı», – dep tarif etti faal.
Onıñ qayd etkenine köre, qıtlıq şaraitlerinde Qırımda yaqarlıq fiyatları artmağa devam ete.
«Añlaşıla ki, benzin tek qıtlıqtan sebep degil, Qırımdaki yaqarlıq şirketleriniñ benzinni yüksek fiyattan satmaq istegeni içün yetmey. Bu vaziyette qırımlılar artıq fiyatlar aqqında açuvlanmay, benzin olsa, «quvanalar». Qırımğa qomşu Rusiyeden kelgen turistler anda ATAN şirketiniñ yaqarlıq stantsiyalarında bile benzin fiyatı 15-20 ruble ucuz, dep haber ete, bu da Qırımda benzinnen bağlı oyunlarnı isbatlay», – dep qayd etti faal.
Berilgen malümatqa köre, Qırım soñki yıllarda eñ büyük yaqarlıq buhranını yaşay. Rusiye akimiyeti bunıñ Rusiyede cermay işlenmesiniñ eksilmesinen bağlı olğanını tanıy. Bunıñ sebebi Ukrayina uçucısızlarınıñ Rusiye cermay zavodlarına qarşı muntazam ücümleri oldı.