Ukrayinağa qarşı büyük istilâ başlağanınen Rusiyede ve Rusiye işğal etken Qırımda cenk sebebinden eñ az 1406 barışıqsever sakin elâk oldı, dep saydı "Novaya gazeta Yevropa" neşiri.
Er ay 41 insannıñ ölümi belli ola. 2026 senesinden başlap 183 insan elâk olddı: bir yıl evelsi aynı müddette olğan raqamda 2,4 qat ziyade, dep qayd ete neşir.
Zarar körgen regionlarnen beraber elâk olğan barışıqsever sakinlerniñ sayısı arta: neşir 27 regiondan qurbanlarnı qayd etti. 2026 senesinden olarğa Smolensk, Tver, Yaroslav ve Vladimir vilâyetleri, Adıgeya, Başqortostan ve Çuvaşiya cumhuriyetleri qoşuldı.
Eñ çoq barışıqsever insanlar uçucısızlarnıñ ücümleri neticesinde elâk ola, dep bildire "Novaya gazeta Yevropa". Dronlarnıñ sayısı er ay arta.
Rusiyede İnsan aqları sabıq vekâletlisi Tatyana Moskalkovanıñ 2026 senesi yanvar ayında bildirgenine köre, daa 524 insan 2024 senesi avgust ayından 2025 senesi mart ayına qadar Ukrayina Silâlı quvetleri alğan Kursk vilâyetinde elâk oldı.
7x7 neşiri 2026 senesi fevralniñ 23-ne qadar Rusiyede (Qırım sayılmay) eñ az 1198 barışıqsever sakin elâk oldı, dep saydı.
Neşirniñ qayd etkenine köre, açıq menbalarda elâk olğanlarnıñ sayısı az kösterile, çünki akimiyet zarar körgen er kes aqqında malümat bergenine dair bir kefalet yoq.
Rusiye Tış işler nazirliginiñ vekili Rodion Miroşnik bildirgenine köre, sekiz biñden ziyade barışıqsever rusiyeli elâk oldı. Valiler elâk olğanlarnıñ çoqusını açıq bildirmese ya da 20222 senesinden soñ işğal etilgen topraqlarnıñ sakinleri de sayılğan olsa, raqam doğru ola bile, dep qayd ete "Novaya gazeta Yevropa".
BM malümatına köre, büyük cenk başlağanından 2025 senesiniñ soñuna qadar aman-aman 15 biñ Ukrayina sakini elâk oldı, 40 biñden ziyade insan yaralandı.
İşğal etilgen topraqlarğa irişüv olmağanı içün ve tasdıqlanmağan adiseler olğanından kerçek raqam daa yüksek ola bile.