Kyivdeki Yaroslav Mudrıy milliy kütüphanesinde «Qırım ve qırımtatar halqınıñ tarihı» kitabı taqdim etildi. Qırım.Aqiqat mühbiri bildirgenine köre, kitapnıñ müellifleri Gülnara Bekirova, Andriy İvanets, Bekir Ablayev, Serğiy Ğromenko, Yuliya Tişçenko ola.
Derslik üç tilde basıldı – ukraince, qırımtatarca ve inglizce.
Kitapnıñ taqdim merasiminde qırımtatar halqınıñ lideri Mustafa Cemilev bar edi. O, Sovetler Birligi zamanında Qırım ve qırımtatar halqınıñ tarihı sovet mefküresi ve siyasetine köre tarif etildi, dep ayttı. Genç olğanda tarih fakultetine okumağa kirmege tırışsa, oña «qırımtatarlar mında alınmay», dep cevap berilgen edi.
Qırımtatar halqınıñ lideri Mustafa Cemilev
«Sovetler dağılğan soñ Valeriy Vozgrinniñ (sovet ve Rusiye tarihçısı – muar.) dört cıltı neşir etilgen edi, amma bu dört cılt bu mevzunen faal meraqlanğan mütehassıs ve insanlar içün edi. Bugün taqdim etilgen kitap ise müim. Emiyeti pek büyük: qısqa, toplu, añlayışlı – qadimiy zamanlardan bugünge qadar. Bu kitapnıñ inglizce çıqması da pek müim», – dep ayttı Qırım.Aqiqatqa Mustafa Cemilev.
Kitap müellifleri bildirgenine köre, kitap yarımadanıñ birinci insanları peyda olğanından künümizge qadar eñ esas tarihiy adise-vaqialar aqqında tarif ete.
«Derslikte Qırım hanlığı tarihınıñ ayrı saifeleri baqıla: peyda oluvı, statusı, Ukraina ile munasebetleri ve zeval sebepleri. Qırımtatar halqınıñ XIX ve XX asırlarda Rusiye ükümdarlığı altında «qara asır» ve milliy yañıdan yaratıluv aqqında tarif etile. Qırımtatar inqilâbı ve cenklerara yigirmi yılnıñ adise-vaqiaları tafsilâtlıca aydınlatıla. Rusiye propagandası uydurğan mif mevzuları ayrıca baqıldı: qırımtatarlarnıñ Ekinci cian cenkinde iştirak etmesi, 1944 senesiniñ sürgünligi, vatanğa qaytuv oğrunda küreş ve mustaqil Ukrainada Qırımda yerleşüv. Derslikniñ soñunda Rusiyeniñ yarımadanı ilhaq etmek ıntıluvı ve yañı işğal şaraitlerinde qırımtatar halqınıñ vaziyeti tarif etile», – dep aytıla neşirde.
Derslik mektep talebeleri yaşında olğanlar içün uyğun bir şekilde azırlanıldı, amma oca, student ve Qırım tarihınen meraqlanğan er keske kelişe.
Daa evel berilgen malümatqa köre, «Qırım ailesi» cemaat teşkilâtı online tasil platformasını, Qırım, qırımtatarlar, medeniyetleri ve sanatları aqqında video derslerini ve uzaqtan derslerini taqdim etti.