Gece ve yanvarniñ 8-nde sabağa doğru işğal etilgen Qırımnıñ çeşit regionlarında dronlarnıñ ücümi sebebinden aqşam başlağan atış ve patlavlar devam etti. Bu aqta "Krımskiy veter" Telegram kanalı haber ete.
"Krımskiy veter" abunecileri İçki, Seyitler, İslâm Terek, Kefe, Keriçte (anda Rusiye ava mudafaasınıñ iş sesleri de eşitildi) dronlarnıñ ücümi ve patlavlar aqqında bildirdi.
Telegram-kanal İçki rayonında dron tüşmesi neticesinde peyda olğan çuqur fotoresimini derc etti.
Berilgen malümatqa köre, Yaltada "reaktiv uçucısıznıñ uçqanı eşitildi, deñiz üzerinde olarnı Rusiye qırıcıları urmağa tırışa".
Saq ve Kezlev şeerleri civarlarında küçlü patlavlar eşitildi. Saba yerli saatnen 7:30-da Keriçte Keriç köprü tarafından patlav eşitildi.
Qırımnıñ saifeleri Aqyarda Deñiz yolcu naqliyatınıñ işi toqtatıldı, dep bildirgen edi.
Rusiye Mudafaa nazirligi saba Qırımda urıp tüşürilgen 14 ukrayin uçucısızı aqqında bildirdi.
Ukrayina arbiyleri al-azırda Qırım yarımadasına qarşı bir ücüm aqqında bildirmedi.
2022 senesinden berli Qırım yarımadası aman-aman er kün uçucısız ve raketalarnıñ ücümlerine oğray, çoqusı allarda bu malümat tasdıqlansa bile, Rusiye Mudafaa nazirligi ya da Rusiye akimiyeti arbiy obyektlerge darbe endirilgenini inkâr ete.