Avgustnıñ 20-ne keçer gecesi işğal etilgen Qırım ve Aqyarda dronlar uçtı, mobil ateş gruppalarınıñ atışları ve patlavlar eşitildi, bütük Qırım yarımadasında elektrik berilüvi toqtatıldı, bu aqta Rusiye akimiyeti ve Qırımnıñ haber saifeleri bildire.
"Krımskiy veter" Telegram kanalı abunecileriniñ malümatına esaslanıp haber etkenine köre, patlavlar Kezlev, Saq, Kefe ("Kafa" elektrik aststantsiyası yanında), Aluşta, Bağçasaray, Saq ve Seyitler rayonlarında eşitildi.
"Krımskiy veter" yazğanına köre, yarı geceden soñ Kerç, Kefe, Aqmescit ve Aqyar elektriksiz qaldı.
Telegram kanalınıñ monitoring gruppası haber etkenine köre, yanğın Qırımda gece blekautınıñ sebebi olğan PS "Taman" 500 kV elektrik aststantsiyasında çıqtı.
"Krımskiy veter" Aluştanıñ Küçük Özen (Maloreçenskoye) köyünde beş patlav aqqında bildirdi, anda, abunecileriniñ malümatına köre, PS "Maloreçenskaya" 110 kV elektrik aststantsiyasında dron ücüm etti.
Aqyarnıñ Rusiye akimiyeti şeerde eki kere ava telükesini ilân etti ve saba "elektrik berilüvi vaqtınca sıñırlandı", dep bildirdi.
"Krımenergo" Rusiye müessisesi "elektrik hatlarında tehnologik bozuvlarğa" esaslanıp, "Cenübiy, Merkeziy ve Ğarbiy energetika rayonlarınıñ mesken yerlerinde" kesüvler aqqında bildirdi.
Rusiye Mudafaa nazirligi saba 18 Rusiye regionı, işğal etilgen Qırım ve Azaq ve Qara deñizlerinde 726 ukrayin uçucısızını tuttı ve yoq etti, dep esabat berdi.
Ukrayina arbiyleri Qırımdaki adiselerni izaatlamadı.
Qırım.Aqiqat bu malümatnı cenk vaziyetinde mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.