Gece ve saba işğal etilgen Qırım ve Aqyar dron ücümine oğradılar, ava telükesi ilân etildi, arbiy uçaq alanları, cermay bazaları ve elektrik altstantsiyaları civarlarında küçlü patlavlar aqqında haber etile.
"Krımskiy veter" Telegram kanalı abunecileriniñ malümatına esaslanıp haber etkenine köre, arbiy uçaq alanları dron darbelerine oğradı: 22:29-da "Saki" uçaq alanı civarında küçlü patlav olddı, 23:01-de "Kaça" uçaq alanı tarafından küçlü patlav oldı, Aqyar tarafına qırıcı uçtı.
"Krımskiy veter" yazğanına köre, küçlü patlavlar oldı: saat 23:25-te Aqmescit civarındaki Sarabuz qasabasında, saat 00:57-de Qurman rayonında, saat 01:41-de Aqmescitte (belki, GRES rayonında) demiryol vokzalı rayonında, Büyük Onlar qasabasında, gece saat ekilerde Kefede, Aqyarda 02:40-ta ve 02:48-de.
Soñra "Krımskiy veter" tam malümat berdi: "İyünniñ 7-nde saat 22:57-de Sarabuz qasabasında demiryolnıñ elektrik aststantsiyasına darbe oldı. Abuneciler bildirgenine köre, patlavnen beraber çiyalar ve patırdı oldı, transformator uzun ve küçlü yana. Bu hatnı qullanğan er kesniñ elektrigi ketti, diger rayonlarda qısmen söndürildi". №1 aststantsiya tren areketini ve demiryoldaki infrastrukturanı, diger esas obyektlerni elektrik energiyasınen temin ete, dep añlattı Telegram kanalı.
"Krımskiy veter" Sarabuz qasabasınen bağlı olaraq abunecileriniñ malümatına esaslanıp, ATAN cermay bazasına üç darbe oldı – 23:43, 23:47 ve 23:48-de, dep bildirdi. "Orta seviyede yanğın çıqtı, keçken darbelerde rezervuarlar yanğanından daa az", – dep yazdı o.
Saba yediden soñ Aqyarda dron ücümleri, Felenk burnu ve "Kaça" uçaq alanı rayonında atışlar qayd etildi.
Aqyarnıñ Rusiye yolbaşçısı Mihail Razvojayevniñ bildirgenine köre, "Aqyarda arbiyler Ukrayina Silâlı quvetleriniñ ücümini keri qaytara, ava mudafaası ve mobil ateş gruppaları çalışa". Ava telükesi şeerde eki kere ilân etildi – 22:43 ve 07:05-te, saat 08:21-de bitti.
Qırımnıñ Rusiye yolbaşçısı Sergey Aksenov Telegram kanalında böyle bildirdi: "Duşman dronınıñ Moskva – Aqmescit yolcu treniniñ teplovozına endirgen darbesi neticesinde, ilk malümatqa köre, maşinacı yaralandı, maşinacı yardımcısı elâk oldı, yolcular yaralanmadı… Al-azırda yolcularnı avtobuslarnen taşıma meselesi çezile".
Ukrayina ve Rusiye arbiyleri bu malümatnı izaatlamadılar.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.