Rusiye arbiyleri avgustnıñ 25-ne keçer gecesi Ukrayinağa "İskander-M" ballistik raketası, X-31P idare etilgen aviatsiya raketası ve 150 darbe uçucısızınen ücüm etti, dep bildirdi Ukrayina Silâlı quvetleriniñ Ava küçleri.
Ukrayina arbiyleriniñ malümatına köre, uçucısızlar ve taqlitçiler Rusiyeniñ eki yönelişinden, işğal etilgen Donetsk ve Qırımdaki Sarabuz qasabasından uçurıldı.
"İlk malümatqa köre, saat 09:00-ğa qadar ava mudafaası memleketniñ şimali, cenübi ve şarqında Shahed, Gerber ve diger dronlar olğan 124 duşman uçucısızını urdı/bastırdı", – dep aytıla haberde.
Arbiylerniñ malümatına köre, ücüm neticesinde 17 yerde darbe qayd etildi, yedi yerde parçalar tüşti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.