Qırımnıñ şarqında Rusiye ava mudafaası çalışa, uçucısız telükesi ilân etildi, dep bildire Rusiye kütleviy haber vastaları Qırımdaki Rusiye Fevqulâde vaziyetler nazirliginiñ idaresi bergen malümatqa esaslanıp.
"Uçucısız telükesi! Qırım Cumhuriyetiniñ şarqında ava mudafaası çalışa. Raat oluñız. Açıq alanlardan uzaq qalıñız", – dep bildire haberlerni "Vesti Krım".
Rusiye Federatsiyası Fevqulâde vaziyetler nazirligi ve kütleviy haber vastaları tafsilâtlı malümat bermey. Rusiye monitoring kanalları Keriç boğazı ve Kefe tarafında uçucısız ücüminiñ telükesi aqqında yaza. Bu malümatnı diger menbalarda teşkermek zor.
Ukrayina ve Rusiye arbiyleri vaziyetni şimdilik izaatlamadılar.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.