İyülniñ 2-nde selden zarar körgen Qırım rayonlarında 169 insan vaqtınca yerleşüv noqtalarında qala. Bu aqta Qırımnıñ Rusiye Fevqulâde vaziyetler nazirligi idaresiniñ matbuat hızmeti bildire.
«Keriçte vaqtınca qaluv noqtalarında 129 insan buluna, 27-si bala. Yaltada vaqtınca yerleşüv noqtalarında 40 kişi buluna, 6-sı bala», – dep aytıla haberde.
Müessise, Yaltada eki mustaqil ev ve çoq daireli evlerniñ dört mağazında suv qala, dep bildirdi. Yedi mustaqil evni topraq bastı.
Viran olğan soqaqlar ve çoplük altında maşinalar: Yaltada yüz bergen tabiat afetiniñ zararı (fotogalereya)
Qırımnıñ Rusiye fevqulâde vaziyetler nazirligi idaresi bildirgenine köre, 2021 senesi iyünniñ 16-ndan 18-ne qadar küçlü yağanaqlar neticesinde 426 azbar, 356 ev, 18 içtimaiy ceetten müim obyektni suv bastı. İyünniñ 22-nde saba, Qırım qurtarıcılarınıñ malümatına köre, Yalta ve Yedi Quyu rayonında 37 ev suvda qala. Umumen suv basqan yerlerden 1783 insan tahliye etildi.
Qırımnıñ Rusiye ükümetiniñ yolbaşçısı Yuriy Gotsanük iyünniñ 25-nde Fevqulâde vaziyetler komissiyasınıñ toplaşuvında Qırımda selden kelgen zarar 200 million rubleden çoq oldı, dep bildirdi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.