Qırımnıñ farqlı taraflarında iyulniñ 1-nde ışıqlar söndürilmege devam ete, dep aytıla Rusiye kontrolindeki yerli akimiyet ve "Krımenergo" Rusiye müessisesiniñ haberlerinde.
"Krımenergo" haberine köre, iyulniñ 1-nde saba Yalta, Vinogradnoye ve Massandra hatlardaki qaza sebebinden elektrik energiyasız qaldılar.
Saq rayonınıñ Rusiye memuriyet yolbaşçısı İgor Nikulenkonıñ malümatına köre, iyulniñ 1-nde sabadan başlap rayonnıñ 18 köyü elektriksiz qaldırıldı.
Qurman rayonınıñ 33 mesken yerinde elektrikler söndürilgenini Rusiye kontrolindeki yerli memuriyet yolbaşçısı Vasiliy Grabovan bildirdi.
Rusiye memurları bunıñ sebebini aytmay, elektrikler ne vaqıt berilecek bildirmey.
İyulniñ 1-nde gece Qırımda atış ve patlav sesleri eşitildi. Rusiye akimiyeti Aqyarda ava telükesini ilân etti. "Krımskiy veter" uydu çekimleriniñ malümatına esaslanıp, Saq rayonınıñ Yañı Qotur köyü yanında PS 330/110 kV "Zapadno-Krımskaya" elektrik aststantsiyasına qarşı darbe aqqında bildirdi. Bu malümatqa köre, "yanğınnıñ esas yeri VRU 110 kVde buluna".
PS 330/110 kV "Zapadno-Krımskaya" elektrik aststantsiyası Qırımnıñ elektrik energiyası tarqatılğan ve berilgen sistemanıñ esas hatı ola – eleyektrik stantsiyalarından qullanıcılarına qadar.
İyün ayında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.