Rusiye Federatsiyası kontrolindeki Qırım Yuqarı mahkemesi İçki rayonınıñ 37 yaşında sakinini Qırım yarımadasında Rusiye arbiy obyektleriniñ koordinatlarını Ukrayina istihbaratına bergeni içün 15 yıl koloniyada qalmasına üküm etti. Bu aqta Rusiye kütleviy haber vastaları Qırım ve Aqyardaki FSB idaresiniñ matbuat hızmeti malümatına esaslanıp bildire.
“Qadın arbiy obyektlerniñ adres ve koordinatlarını, şu cumldeyen Qırım Cumhuriyetinde yerleşken arbiy bölüklerden biriniñ yanıcı-yağlayıcı malzeme anbarınıñ yerini Ukrayina tarafına berdi. Bu malümat Ukrayina Silâlı quvetleriniñ ateş ücümleri içün qullanılacaq edi”, – dep bildire Rusiye FSBsiniñ haberini “Krıminform” agentligi.
Rusiye Federatsiyası Ceza kodeksiniñ 275 maddesine istinaden azatlıqtan marum etüvden ğayrı Rusiye mahkemesi onıñ azatlığını 1,5 yılğa sıñırladı. Qadınnıñ adı ve soyadı aytılmay, açıq izaatları yoq. Rusiye uquq qoruyıcılarınıñ malümatını mustaqil menbalarda tasdıqlamaq imkânsız ola.
Ukrayina mahsus hızmetleri bu ükümni şimdilik izaatlamadı.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.