Ukrayina prezidenti Volodımır Zelenskıynıñ bildirgenine köre, "Qırım olmasa, normal ayatqa tolusınen qaytmaq imkânsız" ve Ukrayina cenkke ketirgen areketler içün Rusiye mesüliyetini bekley. Bu aqta o, sentâbrniñ 23-nde New Yorkta BM Baş assambleyasınıñ yüksek seviye segmenti çerçivesinde başlağan "Qırım platforması" Altıncı sammitinde ayttı.
"Qırım olmasa – telükesizlik ğayrıdan tiklenmese, insanlar ve ayatları qorçalanmasa, Rusiye tutqan esirler azat etilmese ve halqara uquqnıñ temel printsiplerine qaytarılmasa – normal ayatqa qaytmaq, imkânsız olur. Topraq bütünligi müim", – dep qyd etti Zelenskıy.
Halqara uquqqa riayet etilmeli dep aytqan prezident onıñ bozuluvı tek devletler içün degil, ayrı insanlar içün de aqibetli ola, dep qayd etti.
"Halqara uquqnıñ kerçek bir küçke saip olmasını isteymiz. İnsan ayatınıñ kerçek emiyeti barmı buña bağlı… Bu cenkni başlatqan ve başqasınıñ toprağını zapt etken Rusiye mesüliyetke çekilsin isteymiz", – dep qayd etti prezident.
Qırımnı işğalden azat etüv halqara meydançığı ("Qırım platforması") – Ukrayina akimiyetiniñ Ukrayina ve halqara ortaqlarınıñ qırımlılarnıñ aqlarını qorçalav ve qanunsız ilhaq etilgen yarımadanı işğalden azat etüv areketleriniñ koordinatsiyası içün muzakere platformasını quruv teşebbüsidir.
2020 senesi sentâbr ayında BM Baş Assambleyasınıñ 75-inci sessiyasında Ukrayina prezidenti Volodımır Zelenskıy iştirakçi memleketlerni platforma quruluvına qoşulmağa çağırdı.
"Qırım platformasınıñ" inauguratsiya sammiti 2021 senesi avgustnıñ 23-nde Kyivde oldı – Ukrayina Mustaqilliginiñ 30 yılında. O, Qırımnı işğalden azat etüv meselesinde halqara formatnı resmiy şekilde başlatmaq içün yapıldı.
"Qırım platforması" birinci sammitiniñ 43 iştirakçi memleketi Ukrayinanıñ topraq bütünligini halqara seviyede tanılğan sıñırlarda ğayrıdan tiklev beyannamesini imzalap, "Rusiye Qırım ve Aqyarnıñ vaqtınca işğalini qanunlaştırıp olamaz", dep bildirdi. Olar Qırım Muhtar Cumhuriyeti ve Aqyarda Ukrayina kontrolini ğayrıdan tiklemek içün siyasiy, diplomatik ve sıñırlaycaq usullarnen Rusiyege basqı yapmağa niyetlengenlerini bildirgen edi. İştirakçiler Rusiyeni "Qırım platformasına" qoşulıp, maqsadlarını paylaşmağa çağırdı.