İşğal etilgen Qırımda gece dronlar keldi, atış ve küçlü patlavlar eşitildi, dep haber ete Qırımnıñ kütleviy haber vastaları.
Ukrayinağa qoltutqan "Krımskiy veter" Telegram kanalı abunecileriniñ malümatına esaslanıp, Or Qapıda (21:06) atış ve Or Qapı rayonında cenüpke doğru dron (22:11) uçqanını bildirdi. Kefe (21:44), Canköy rayonı (22:42) ve "İslâm Terek rayonında pek küçlü patlav" (22:43) oldı, dep yazdı.
Rusiye Federatsiyasınıñ Mudafaa nazirligi saba Rusiye regionları, işğal etilgen Qırım ve Qara ve Azaq deñizlerinde 141 ukrayin uçucısızını yoq etti, dep bildirddi. Rusiye müessisesi tüşürilgen uçucısızlarnıñ sayısını aydınlatmadı.
Ukrayina arbiyleri haber derc etilgende Qırımdaki vaziyetni izaatlamağan edi.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.