Aprelniñ 30-na keçer gecesi işğal etilgen Qırım dronlarnıñ ücümine oğradı, küçlü patlavlar oldı, Keriç köprü qapatıldı – dep bildirdi Qırımnıñ kütleviy haber vastaları.
Qırım saifeleri Or Qapı ve Canköy rayonlarında uçucısız ücüminiñ telükesi aqqında yazğan edi.
"Krımskiy veter" Telegram kanalı 11 daqqa devamında (22:29, 22:34 i 22:40) Or Qapıda üç küçlü patlav aqqında bildirdi. Saat 3:35-te abunecileriniñ malümatına esaslanıp, Keriç boğazı üzerine ateş ve Keriç köpründe söndürilgen ışıqlar aqqında yazdı, saat 3:11-de köpür maşina ve trenlerniñ keçişine qapatıldı. Al-azırda tren naqliyat keçişine qapalı qala.
Saat 4:44-te "Krımskiy veter" Keriçte küçlü patlavlar aqqında haber etti.
Ukrayina ve Rusiye arbiyleri haber derc etilgende Qırımdaki vaziyetni izaatlamadı.
Qırım.Aqiqat muarririyetiniñ cenk vaziyetinde bu malümatnı mustaqil şekilde teşkermek imkânı yoq.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.