Martnıñ 1-nde aqşam ve martnıñ 2-ne keçer gecesi işğal etilgen Qırımnıñ farqlı regionlarında küçlü patlavlar eşitildi. Bu aqta Qırım telegram kanalları haber etti, Rusiye kontrolindeki yerli akimiyet ise ava telükesiniñ başlanğıçı ve soñu aqqında ilân etti.
"Krımskiy veter" Telegram kanalı haber etkenine köre, eki küçlü patlav martnıñ 1-nde aqşam İslâm Terek rayonında Eski Qırım arbiy poligonı tarafında oldı. Telegram kanalınıñ abunecileri Kefede raketa ve qızarıntı, Saq ve Keriçte patlavlar aqqında bildirdi.
Telegram kanalı abunecileriniñ malümatına esaslanıp, Or Qapı ve Canköy rayonlarında, Keriçte dronlar ve Aqmescitte raketalar aqqında yazdı.
Aqşam Aqyar, Saq, Kefe, İslâm Terek rayonı ve Kezlevniñ bir qısmında elektrik energiyası söndürilgen edi.
Aqyarnıñ Rusiye yolbaşçısı Mihail Razvojayev telegram kanalında böyle yazdı: "Aqyarda elektrik energiyasınıñ berilüvinde aralar bar. İlk malümatqa köre, sebep – Qırımnıñ energetik sistemasında qazaiy söndirüvler. №6, 7, 15 alt stantsiyalarındaki elektrik energiyasından temin etilgen rayonlarnıñ qullanıcıları söndürildi. Aqyarnıñ bu rayonlarında qullanıcılar elektriksiz qaldı: Balıqlava, Kazaçya körfezi. Kamışovaya körfezi, Streletskaya körfezi, Felenk burnu, şeer merkezi".
Qırımnıñ Rusiye yolbaşçısınıñ mesleatçısı Krüçkov "magistral elektrik hatlarında olğan qaza" sebebinden elektrikler yoq, dep añlattı.
Aqyarda elektrik energiyasınıñ berilüvi ğayrıdan tiklendi.
Rusiye Mudafaa nazirligi saba esabatında ava mudafaasınıñ vastaları "uçaq çeşitli 172 ukrayin uçucısızını urdı", Qırımda 23, Qara deñizde 67, Azaq deñizinde 8 uçucısıznı, dep yazdı.
Ukrayina arbiyleri vaziyetni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, bu malümatnı teşkermege imkân olsa da, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.