İyulniñ 6-na keçer gecesi kene patlavlar ve atış eşitildi, dep haber ete yerli Telegram kanalları.
"Krımskiy veter" Telegram kanalı yerli sakinlerniñ malümatına esaslanıp haber etkenine köre, patlavlar Aqmescit, Keriç ve Sarabuzda eşitildi. Aqyarnıñ Rusiye yolbaşçısı Mihail Razvojayev şeerde ava telükesini ilân etti, Qırımnıñ Rusiye akimiyeti ise gece eki kere Keriç köpründe areket qapatılddı, dep bildirdi.
İyulniñ 6-nda saba "Krımskiy veter" Keriçte "TES" şirketiniñ cermay gaz terminalına, Aqmescitteki Mamaq köyü civarındaki 330 kV "Aqmescit" eletrik aststantsiyasına ve Sarabuz qasabasındaki Rusiye arbiy uçaq alanına darbe endirildi, dep haber etti. NASA Firms uydu hızmeti bu obyektler civarında yanğın çıqqanını qayd ete.
İyulniñ 6-nda saba Rusiye akimiyeti Aluşta, Yalta, Bağçasaray ve Aqmescitte elektrik energiyası yoq, dep bildirdi. Aqyarda ışıq olmağanını Razvojayev de bildirdi, amma soñra elektrikler qısmen berildi, dep haber etti. Qırım ve Aqyardaki Rusiye akimiyeti diger ücüm aqibetleri aqqında bildirmediler.
Rusiye Mudafaa nazirligi iyulniñ 6-nda saba Rusiyede 21 regionda, Qırımda ve Qara ve Azaq deñizlerinde urulğan 519 dron aqqında bildirdi. Bunı isbatlaycaq bir delil olmadı, cenk vaziyetinde ise diger menbalarda malümat teşkermek imkânsız ola. Tüşürilemegen uçucısızlar aqqında müessise haber etmey. Darbe aqibetleri aydınlatılmay.
Ukrayina arbiyleri bu ücümlerni şimdilik izaatlamadı.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.